«СҚ-Фармация» жауапкершілігі шектеулі серіктестігінің Байқау кеңесінің ережесін бекіту туралы» Қазақстан Республикасы Денсаулық сақтау министрінің 2017 жылғы 18 тамыздағы № 618 бұйрығы (2019.30.09. берілген өзгерістер мен толықтырулармен)

«СҚ-Фармация» жауапкершілігі шектеулі серіктестігінің Байқау кеңесінің ережесін бекіту туралы
Қазақстан Республикасы Денсаулық сақтау министрінің 2017 жылғы 18 тамыздағы № 618 бұйрығы

(2019.30.09. берілген өзгерістер мен толықтырулармен)

«СҚ-Фармация» жауапкершілігі шектеулі серіктестіктің (бұдан әрі - Серіктестік) Жарғысының 39-тармағының 2-, 7-тармақшаларына сәйкес БҰЙЫРАМЫН:

1. Қазақстан Республикасы Денсаулық сақтау министрінің 2014 жылғы 28 шілдедегі № 426 «Серіктестіктің Байқау кеңесі туралы Ережені бекіту туралы» бұйрығының күші жойылсын.

2. Серіктестіктің Байқау кеңесі туралы қоса беріліп отырған Ереже бекітілсін.

3. Байқау кеңесі мен Серіктестік Басқармасы осы бұйрықтан туындайтын шараларды қолдансын.

4. Осы бұйрықтың орындалуын бақылауды өзіме қалдырамын.

5. Осы бұйрық Серіктестіктің Жалғыз қатысушысының шешімі болып табылады және оған қол қойылған күннен бастап күшіне енеді.

Қазақстан Республикасы

Денсаулық сақтау министрінің

2017 жылғы 18 тамыздағы

№ 618 бұйрығымен бекітілген

«СҚ-Фармация» жауапкершілігі шектеулі серіктестігінің
Байқау кеңесі туралы

ережесі

1. Жалпы ережелер

1. Осы «СҚ-Фармация» жауапкершілігі шектеулі серіктестігінің (бұдан әрі - Серіктестік) Байқау кеңесі туралы Ережесі (бұдан әрі - Ереже) «Жауапкершілігі шектеулі және қосымша жауапкершілігі бар серіктестіктер туралы» Қазақстан Республикасының Заңына (бұдан әрі - Заң), Қазақстан Республикасының өзге де нормативтік құқықтық актілерге, Серіктестіктің Жарғысына (бұдан әрі - Жарғы) «СҚ-Фармация» жауапкершілігі шектеулі серіктестігінің қызметін реттейтін ішкі құжаттар мен басқа да құжаттардың тізбесін бекіту туралы» Қазақстан Республикасы Денсаулық сақтау және әлеуметтік даму вице-министрінің 2017 жылғы 20 қаңтардағы № 25 бұйрығына сәйкес әзірленді.