«І санаттағы объектілер үшін экологиялық рұқсаттар беру» мемлекеттік көрсетілетін қызмет стандарты (Қазақстан Республикасы Үкіметінің 2014 жылғы 3 маусымдағы № 607 қаулысымен бекітілген) (күші жойылды)

ҚР Үкіметінің 2015.01.10. № 808 Қаулысымен күші жойылды

Қазақстан Республикасы

Үкіметінің

2014 жылғы 3 маусымдағы

№ 607 қаулысымен

бекітілген

«І санаттағы объектілер үшін экологиялық рұқсаттар беру»

мемлекеттік көрсетілетін қызмет стандарты

1. Жалпы ережелер

1. «І санаттағы объектілер үшін экологиялық рұқсаттар беру» мемлекеттік көрсетілетін қызметі (бұдан әрі - мемлекеттік көрсетілетін қызмет).

2. Мемлекеттік көрсетілетін қызмет стандартын Қазақстан Республикасы Қоршаған орта және су ресурстары министрлігі (бұдан әрі - Министрлік) әзірледі.

3. Мемлекеттік қызметті:

Табиғат пайдаланушыда эмиссиялардың бір түрі орын алған және мыналардан асатын жағдайда, Министрліктің Экологиялық реттеу және бақылау комитеті көрсетеді:

1) ластаушы заттардың шығарындылары - жылына 5000 тонна, мұнай-газ өнеркәсібі үшін - жылына 500 тонна;

2) ластаушы заттардың төгінділері - жылына 10000 тонна;

3) өндіріс және тұтыну қалдықтарын орналастыру - жылына 500000 тонна.

Қалған жағдайларда Экологиялық реттеу және бақылау комитетінің аумақтық бөлімшелері (бұдан әрі - көрсетілетін қызметті берушілер) көрсетеді.

Өтініштерді қабылдау және мемлекеттік қызмет көрсету нәтижелерін беру:

1) көрсетілетін қызметті берушілердің кеңсесі;

2) www.e.gov.kz «электрондық үкімет» веб-порталы (бұдан әрі - портал) арқылы жүзеге асырылады.

2. Мемлекеттік қызметті көрсету тәртібі

4. Мемлекеттік қызметті көрсету мерзімдері:

1) көрсетілетін қызметті берушілерге құжаттар топтамасын тапсырған сәттен бастап, сондай-ақ порталға жүгінген кезде:

рұқсат беру - 2 (екі) айдан аспайды;

рұқсатты қайта ресімдеу - 1 (бір) ай ішінде;

кешенді экологиялық рұқсат беру - 3 (үш) ай ішінде;

өтінішті одан әрі қараудан дәлелді бас тарту - күнтізбелік 15 (он бес) күн ішінде;

2) көрсетілетін қызметті алушының құжаттарды тапсыруы үшін күтудің рұқсат етілген ең ұзақ уақыты - 30 минут;

3) көрсетілетін қызметті алушыға қызмет көрсетудің рұқсат етілген ең ұзақ уақыты - 30 минут.