(БҰРЫНҒЫ РЕДАКЦИЯ) «ЯДРОЛЫҚ ЖӘНЕ РАДИАЦИЯЛЫҚ АВАРИЯЛАРҒА ДЕН ҚОЮДЫҢ ҰЛТ...

Ядролық және радиациялық аварияларға ден қоюдың ұлттық жоспарын бекіту туралы
Қазақстан Республикасы Үкіметінің 2016 жылғы 19 тамыздағы № 467 Қаулысы

Осы редакция 2022 жылғы 29 маусымда енгізілген өзгерістеріне дейін қолданылды

«Атом энергиясын пайдалану туралы» Қазақстан Республикасының 2016 жылғы 12 қаңтардағы Заңы 5-бабының 7) тармақшасына сәйкес Қазақстан Республикасының Үкіметі ҚАУЛЫ ЕТЕДІ:

1. Қоса беріліп отырған Ядролық және радиациялық аварияларға ден қоюдың ұлттық жоспары бекітілсін.

2. Осы қаулы алғашқы ресми жарияланған күнінен бастап күнтiзбелiк он күн өткен соң қолданысқа енгiзiледi.

Қазақстан Республикасы

Үкіметінің

2016 жылғы 19 тамыздағы

№ 467 қаулысымен

бекітілген

Ядролық және радиациялық аварияларға ден қоюдың

 ұлттық жоспары

1. Жалпы ережелер

1. Осы Ядролық және радиациялық аварияларға ден қоюдың ұлттық жоспары (бұдан әрі - Жоспар) «Атом энергиясын пайдалану туралы» Қазақстан Республикасының 2016 жылғы 12 қаңтардағы Заңы (бұдан әрі - Заң) 5-бабының 7) тармақшасына сәйкес әзірленді.

2. Осы Жоспар Қазақстан Республикасының орталық және жергілікті атқарушы органдарына, атом энергиясын пайдалану саласындағы қызметті жүзеге асыратын жеке және заңды тұлғаларға қолданылады.

3. Осы Жоспарда мынадай ұғымдар пайдаланылады:

1) төтенше жағдайлар (техногендік сипаттағы) - қауіпті өндірістік факторлардың зиянды әсерінен, көлік авариялары мен басқа да авариялардан, өрттерден (жарылыстардан), күшті әсер ететін улы, радиоактивті және биологиялық қауiптi заттар жайылатын (жайылу қатері бар) авариялардан, ғимараттар мен құрылыстардың кенеттен құлауынан, бөгеттердің бұзылуынан, тiршiлiктi қамтамасыз ететін электр энергетикасы және коммуникация жүйелерiндегi, тазарту құрылыстарындағы авариялардан болған төтенше жағдайлар;