«Оңтүстік электр желілері» ашық акционерлік қоғамының конкурстық массасын сатудың ерекше шарттары мен тәртібі туралы Қазақстан Республикасы Үкіметінің 2006 жылғы 9 тамыздағы № 754 Қаулысы

«Оңтүстік электр желілері» ашық акционерлік қоғамының конкурстық
массасын сатудың ерекше шарттары мен тәртібі туралы
Қазақстан Республикасы Үкіметінің 2006 жылғы 9 тамыздағы
№ 754 Қаулысы

«Банкроттық туралы» Қазақстан Республикасының 1997 жылғы 21 қаңтардағы Заңы 2-бабының 4-тармағына сәйкес, табиғи монополия субъектісі болып табылатын «Оңтүстік электр желілері» ашық акционерлік қоғамын банкрот деп тануға байланысты Қазақстан Республикасының Үкіметі ҚАУЛЫ ЕТЕДІ:

1. «Оңтүстік электр желілері» ашық акционерлік қоғамының (бұдан әрі - қоғам) конкурстық массасын сатудың:

1) қоғамның өндірістің біртұтас технологиялық циклін қамтамасыз ететін мүліктік кешенін бірыңғай лотпен (бұдан әрі - лот) сатуды;

2) лотты сатудың ең төменгі бағасын әкімшілік шығыстар мен бірінші және екінші кезектегі кредиторлар талаптарының сомаларынан төмен емес етіп белгілеуді;

3) банкроттық рәсімін технологиялық циклдің үздіксіздігін сақтай отырып өткізуді көздейтін ерекше шарттары мен тәртібі белгіленсін.

2. Лотты сатып алушыларға мынадай қосымша талаптар белгіленсін:

1) қызмет бейінін, тұтынушылармен шарттарды және ұсынылатын қызметтердің көлемін сақтау жөніндегі міндеттемелерді қабылдау;

2) қоғам қызметкерлерімен еңбек шарттарын жасасуды қамтамасыз ету;

3) электр энергиясын беру мен бөлу, электр энергиясын қайта сату мақсатында сатып алу жөніндегі қызметті жүзеге асыруға арналған лицензияларының болуы;

4) сатып алушының өз қаражаты есебінен елді мекендерді орталықтандырылған электрмен жабдықтауға қосу үшін бір жүз қырық бір километр электр беру желілерін салу;

5) жыл сайын кемінде 56 000 000 (елу алты миллион) теңге сомасына негізгі құралдарды жөндеуді жүргізу;

6) 45 000 000 (қырық бес миллион) теңгеге жабдықтарды жаңғыртуды және техникалық қайта жарақтандыруды жүргізу.

3. Осы қаулы қол қойылған күнінен бастап қолданысқа енгізіледі.