«Жекеше айыптау істері бойынша сот практикасы туралы» Қазақстан Республикасы Жоғарғы Сотының 2006 жылғы 25 желтоқсандағы № 13 Нормативтік қаулысы (2020.11.12. берілген өзгерістер мен толықтырулармен)

Жекеше айыптау істері бойынша сот практикасы туралы
Қазақстан Республикасы Жоғарғы Сотының 2006 жылғы 25 желтоқсандағы № 13 Нормативтік қаулысы

(2020.11.12. берілген өзгерістер мен толықтырулармен)

ҚР Жоғарғы Сотының 2018.20.04. № 8 Нормативтік қаулысымен тақырыбы өзгертілді (бұр.ред.қара)

ҚР Жоғарғы Сотының 2018.20.04. № 8 Нормативтік қаулысымен бүкіл мәтін бойынша:

«Жеке айыптау», «жеке айыптау», «жеке айыптаушымен», «жеке айыптаушы», «жеке айыптаушының», «жеке айыптаушыларға», «Жеке айыптаушыға» деген сөздер тиісінше «Жекеше айыптау», «жекеше айыптау», «жекеше айыптаушымен», «жекеше айыптаушы», «жекеше айыптаушының», «жекеше айыптаушыларға», «Жекеше айыптаушыға» деген сөздермен ауыстырылды, «ҚІЖК» деген сөз «ҚПК-нің» деген сөздермен ауыстырылды (бұр.ред.қара)

ҚР Жоғарғы Сотының 2018.20.04. № 8 Нормативтік қаулысымен кіреспе өзгертілді (бұр.ред.қара)

Жекеше айыптау жөніндегі қылмыстық істерді қарау кезінде заңдарды біркелкі және дұрыс қолдану мақсатында, сонымен қатар осыған байланысты сот практикасында туындаған мәселелер бойынша Қазақстан Республикасы Жоғарғы Сотының жалпы отырысы, Қаулы етеді:

1. Соттар жекеше айыптау қылмыстық істері бойынша іс жүргізу кезінде азаматтардың ар-намысын, қадір-қасиетін және жеке басына қол сұғылмаушылық құқықтарын, олардың басқа да конституциялық құқықтарының сотта қорғалуын қамтамасыз ету мақсатында заң талаптарын нақты және бұлжытпай орындауы керек.

ҚР Жоғарғы Сотының 2018.20.04. № 8 Нормативтік қаулысымен 2-тармақ өзгертілді (бұр.ред.қара)

2. Жекеше айыптауды қозғауға жәбірленушінің: 18 жасқа толған жеке тұлғаның, заңды тұлғаның, Қазақстан Республикасы Қылмыстық-процестік кодексінің (бұдан әрі - ҚПК) 71, 76-баптарында көрсетілген жәбірленушінің заңды өкілдерінің және өкілдерінің шағымы себеп болады.