«Заңды тұлғаларды - Алматы қаласының өңірлік қаржы орталығының қатысушыларын мемлекеттік тіркеу (қайта тіркеу)» мемлекеттік қызмет көрсету стандарты (Қазақстан Республикасы Президентінің 2010 жылғы 4 наурыздағы № 932 Жарлығымен бекітілген) (күші жойылды)

ҚР Президентінің 2011.31.01. № 1145 Жарлығымен стандарт жаңа редакцияда (бұр.ред.қара)

Қазақстан Республикасы

Президентінің

2010 жылғы 4 наурыздағы

№ 932 Жарлығымен

бекітілген

ҚР Президентінің 2011 жылғы 14 желтоқсандағы № 196 Жарлығымен күші жойылды

«Заңды тұлғаларды - Алматы қаласының өңірлік қаржы орталығының қатысушыларын мемлекеттік тіркеу (қайта тіркеу)»
мемлекеттік қызмет көрсету стандарты
 
 
1. Жалпы ережелер

1. Мемлекеттік қызметті Қазақстан Республикасы Алматы қаласының өңірлік қаржы орталығының қызметін реттеу агенттігі (бұдан әрі - Агенттік) мына мекенжай бойынша көрсетеді: Алматы қаласы, Д. Қонаев көшесі, 181.

2. Мемлекеттік қызмет көрсету нысаны: жартылай автоматтандырылған.

3. Мемлекеттік қызмет «Заңды тұлғаларды мемлекеттік тіркеу және филиалдар мен өкілдіктерді есептік тіркеу туралы» 1995 жылғы 17 сәуірдегі Қазақстан Республикасы Заңының 4-бабы, «Алматы қаласының өңірлік қаржы орталығы туралы» 2006 жылғы 5 маусымдағы Қазақстан Республикасы Заңының 5-бабы 2-тармағының 1) тармақшасы және «Заңды тұлғалар - Алматы қаласының өңірлік қаржы орталығының қатысушыларын мемлекеттік тіркеу (қайта тіркеу) ережесін бекіту туралы» Агенттік төрағасының 2007 жылғы 2 шілдедегі № 02-02/158а бұйрығы негізінде көрсетіледі.

4. Осы мемлекеттік қызмет көрсету стандарты (бұдан әрі - Стандарт) Агенттіктің www.rfca.gov.kz  интернет-ресурсында, Агенттік ғимаратының дәлізінде, сонымен қатар Қазақстан Республикасының бүкіл аумағында таратылатын бұқаралық ақпарат құралдарында орналастырылады. Қосымша ақпаратты Агенттіктің тегін анықтама қызметінде 8 (727) 244-95-00 телефоны арқылы алуға болады.

5. Мемлекеттік қызметті көрсетудің аяқталу нысаны заңды тұлға - қаржы орталығының қатысушысына мемлекеттік тіркеу (қайта тіркеу) туралы қағаз жеткізгіштегі куәлік (бұдан әрі — мемлекеттік тіркеу туралы куәлік) және Қазақстан Республикасының салық төлеушісінің куәлігін беру, мәліметтерді Алматы қаласының өңірлік қаржы орталығы қатысушыларының мемлекеттік тізіліміне енгізу болып табылады.