Кыргыз Республикасынын Жогорку Сотунун төрагасынын орунбасары К.К.Акназарованын Жогорку соттун жарандык иштер боюнча соттук коллегиясынын 2009-жылдагы иши жана 2010-жылдагы иш пландары жөнүндө баяндамасы

Кыргыз Республикасынын Жогорку Сотунун төрагасынын орунбасары К.К.Акназарованын Жогорку соттун жарандык иштер боюнча соттук коллегиясынын 2009-жылдагы иши жана 2010-жылдагы иш пландары жөнүндө
баяндамасы
 
Урматтуу коллегалар!

Акыркы жылдарда орун алган райондук сотторго түшүп жаткан жарандык иштердин өсүү тенденциясы 2009-жылы да сакталган. Отчёт мезгилинде райондук сотторго 2008-жылга салыштырмалуу 14,31 %га көп иштер түшкөн.

Саны жагынан, эгерде 2007-жылы 42277, ал эми 2008-жылы 44871 иш түшсө, 2009-ж. 51293 иш түшкөн. Түшкөндөрдүн арасынан 49324 иш каралган - бул 2008-жылга салыштырмалуу 12,95%га көп. Чечим чыгаруу менен 33176 иш же 2008-жылга Караганда 4,87%га көп иш каралган.

Чечим чыгаруу менен каралган иштер (33176) боюнча 96,49% доо арыздар канааттандырылган - бул 2008-жылга салыштырмалуу 0,6%га азыраак (97,1%).

Каралып бүтүрүлгөн иштердин түзүлүшүндө, мурдагыдай эле, негизинен кредит милдеттенмелери жана карыз суммасын кайтаруу (28,51%), үй-бүлөлүк (26,62%), юридикалык мааниси бар фактыларды аныктоо (8,43%), келишимдерди жарактуу/жараксыз деп табуу (5,48%), ошондой эле турак-жай талаштары (3,5%) боюнча жарандык иштер белгиленет.

Мында, кредит милдеттенмелери жана карыз суммасын кайтаруу боюнча иштер 2008-жылга (7060) салыштырмалуу 2009-жылы (14060) эки эсе көп түшкөн. Башка категориялар боюнча өсүү турак-жай талаштары (19,7%га), үй-бүлөлүк (16%га), ошондой эле келишимдерди жарактуу/жараксыз деп табуу (9,51 %га) иштери боюнча байкалат. Ошол эле мезгилде эмгек талаштары боюнча иштердин саны 2008-жылга (3300) салыштырмалуу 4,4 эсеге кыскарган (749). Ошондой эле, юридикалык мааниси бар фактыларды аныктоо боюнча иштердин саны да 10,9%га азайган.

2009-жылдын июль айында өткөрүлгөн Кыргыз Республикасынын Президентин шайлоого байланыштуу, соттор тарабынан 43 иш каралып бүткөн. 2008-жылы жергиликтүү кеңештердин депутаттарын шайлоого байланыштуу, кыйла көбүрөөк иштер каралган (1919), бул иштердин дээрлик көпчүлүгү ошол мезгилдеги Кыргыз Республикасынын «Шайлоо жөнүндө» Кодексинин редакциясына ылайык жарандардын кошумча тизмелерге киргизүү жөнүндөгү арыздары ээлегенин айта кетүү керек.