«Даму мүмкіндіктері шектеулі балаларды психологиялық-педагогикалық қолдаудың әдістемелік ұсынымдарын бекіту туралы» Қазақстан Республикасы Білім және ғылым министрінің 2011 жылғы 12 желтоқсандағы № 524 бұйрығы

Даму мүмкіндіктері шектеулі балаларды психологиялық-педагогикалық қолдаудың әдістемелік ұсынымдарын бекіту туралы
Қазақстан Республикасы Білім және ғылым министрінің 2011 жылғы 12 желтоқсандағы № 524 бұйрығы

Даму мүмкіндігі шектеулі балаларға тең колжетімді білім беру қызметтерін ұсыну бойынша жағдайлар жасау мақсатында БҰЙЫРАМЫН:

1. Қоса беріліп отырған «Даму мүмкіндіктері шектеулі балаларды психологиялық-педагогикалық қолдаудың әдістемелік ұсынымдары» бекітілсін.

2. Мектепке дейінгі және орта білім департаменті (Ж.А. Жонтаева) осы бұйрықты облыстық, Астана, Алматы қалаларының білім басқармаларының назарына жеткізсін.

3. Даму мүмкіндіктері шектеулі балаларды психологиялық-педагогикалық қолдаудың әдістемелік ұсынымдары Қазақстан Республикасы Білім және ғылым министрлігінің сайтында жариялансын.

4. Осы бұйрықтың орындалуын бақылау вице-министр М.Н. Сарыбековке жүктелсін.

Қазақстан Республикасы

Білім және ғылым министрінің

2011 жылғы 12 желтоқсандағы № 524

бұйрығымен

бекітілген

Даму мүмкіндіктері шектеулі балаларға психологиялық-

педагогикалық қолдауды ұйымдастыру бойынша әдістемелік ұсынымдар

1. Жалпы ережелер

1. Осы ұсынымдар мектепке дейінгі және мектеп жасындағы мүмкіндіктері шектеулі балаларды психологиялық-педагогикалық қолдауды ұйымдастыру арқылы тең қолжетімді білім беру қызметтерін ұсыну бойынша жағдайлар жасау мақсатында әзірленген.

2. Психологиялық-педагогикалық қолдау баланы білім беру-тәрбиелеу үдерістері жағдайында дамытуды қамтамасыз ететін көмек пен қолдаудың ерекше бір түрі болып табылады және әрбір баланың мүмкіндігі мен қажеттілігіне сәйкес оны табысты оқыту мен дамуы үшін әлеуметтік-психологиялық және педагогикалық жағдай тудыратын мамандардың ұйымдық қызметінің тұтас жүйесін білдіреді.

3. Психологиялық-педагогикалық қолдаудың негізгі міндеттері:

1) балалардың дамуындағы кемшіліктерді ерте (анықталған сәттен) түзетуді ұйымдастыру;

2) балаға және оның отбасына даму, оқу, әлеуметтену міндеттерін шешуге көмектесу (ықпал ету);