«Агроөнеркәсіп кешені саласында қызметін жүзеге асыратын азаматтық қызметшілерді аттестаттаудан өткізу қағидаларын бекіту туралы» Қазақстан Республикасы Ауыл шаруашылығы министрінің 2013 жылғы 3 маусымдағы № 20/255 бұйрығы (күші жойылды)

Агроөнеркәсіп кешені саласында қызметін жүзеге асыратын азаматтық қызметшілерді аттестаттаудан өткізу қағидаларын бекіту туралы
Қазақстан Республикасы Ауыл шаруашылығы министрінің 2013 жылғы 3 маусымдағы № 20/255 бұйрығы

ҚР Ауыл шаруашылығы министрінің 2016 жылғы 22 қаңтардағы № 18 бұйрығымен күші жойылды

Қазақстан Республикасы Еңбек кодексінің 233-бабына сәйкес, агроөнеркәсіп кешені саласында қызметін жүзеге асыратын азаматтық қызметшілердің кәсіптік және біліктілік даярлығы деңгейін, іскерлік қасиеттерін айқындау мақсатында БҰЙЫРАМЫН:

1. Қоса беріліп отырған Агроөнеркәсіп кешені саласында қызметін жүзеге асыратын азаматтық қызметшілерді аттестаттаудан өткізу қағидалары бекітілсін.

2. Қазақстан Республикасы Ауыл шаруашылығы министрлігінің Әлеуметтік саясат басқармасы (С.С. Лепешко):

1) осы бұйрықты Қазақстан Республикасы Әділет министрлігінде мемлекеттік тіркеуді;

2) осы бұйрықты оның ресми тіркелуінен кейін бұқаралық ақпарат құралдарында жариялауды қамтамасыз етсін.

3. Осы бұйрықтың орындалуын бақылау Қазақстан Республикасы Ауыл шаруашылығы вице-министрі М.Е. Толыбаевқа жүктелсін.

4. Осы бұйрық алғаш рет ресми жарияланған күнінен кейін он күнтізбелік күн өткен соң қолданысқа енгізіледі.

Қазақстан Республикасы

Ауыл шаруашылығы министрінің

2013 жылғы 3 маусымдағы

№ 20/255 бұйрығымен

бекітілген

Агроөнеркәсіп кешені саласында қызметін жүзеге асыратын
азаматтық қызметшілерді аттестаттаудан өткізу
қағидалары


1. Жалпы ережелер

1. Осы Азаматтық қызметшілерді аттестаттаудан өткізу қағидалары (бұдан әрі - Қағидалар) Қазақстан Республикасы Еңбек кодексінің 233-бабына сәйкес әзірленді және агроөнеркәсіп кешені саласында қызметін жүзеге асыратын азаматтық қызметшілерді (бұдан әрі - қызметшілер) аттестаттаудан өткізу тәртібін айқындайды.

2. Қызметшілерді аттестаттау - олардың кәсіптік-біліктілік даярлығының, іскерлік қасиеттерінің деңгейін айқындау жөнінде кезеңдеп жүзеге асырылатын рәсім.