«Даулы мүліктің иесі ғана мүлікті тыйым салудан босатуды талап етуге құқылы» Қазақстан Республикасы Жоғарғы Сотының азаматтық және әкімшілік істер жөніндегі қадағалау сот алқасының 2013 жылғы 24 сәуірдегі № 3гп-153-13 Қаулысынан үзінді

Даулы мүліктің иесі ғана мүлікті тыйым салудан босатуды талап етуге құқылы
Қазақстан Республикасы Жоғарғы Сотының азаматтық және әкімшілік істер жөніндегі қадағалау сот алқасының 2013 жылғы 24 сәуірдегі № 3гп-153-13 Қаулысынан үзінді

«БИС» жауапкершілігі шектеулі серіктестігі (бұдан әрі - ЖШС) жауапкерлер Б. мен «Қызылорда қалалық қаржы бөлімі» мемлекеттік мекемесіне (бұдан әрі- Мекеме) қарсы, Қызылорда қалалық сотының 2011 жылғы 14 маусымдағы үкімімен мемлекет кірісіне тәркіленген айғақ затты тыйым салудан босату туралы талап арызбен сотқа жүгінген.

Қызылорда қалалық сотының 2011 жылғы 25 қазандағы шешімімен ЖШС-нің талап арызы қанағаттандырылып, мемлекет пайдасына тәркіленген 959,230 тонна таза мұнай қалдықтары тыйым салудан босатылған.

Іс апелляциялық және кассациялық тәртіпте қаралмаған.

Қазақстан Республикасының Бас прокуроры наразылығында іс бойынша қабылданған сот актісінің күшін жойып, талапкердің талап арызын қанағаттандырусыз қалдыру туралы жаңа шешім қабылдауды сұраған.

Жоғарғы Соттың азаматтық және әкімшілік істер жөніндегі қадағалау сот алқасы іс материалдарын зерттеп, дауланып отырған сот актісі төмендегі негіздерге байланысты бұзылуға жатады деп санайды.

Азаматтық іс жүргізу кодексінің (әрі қарай - АІЖК) 387-бабына сәйкес, материалдық нормалардың немесе іс жүргізу құқығының едәуір бұзылуы соттың заңды күшіне енген шешімдерін, ұйғарымдарын, қаулыларын қадағалау тәртібімен қайта қарауға негіз болады.

Қызылорда қалалық сотының 2011 жылғы 14 маусымдағы үкімімен Б. Қылмыстық кодекстің (әрі қарай - ҚК) 192-бабының 1-бөлігімен (жалған кәсіпкерлік) кінәлі деп танылып, 2 жыл мерзімге шартты түрде сотталған. Айғақ зат - 1 160,425 тонна шикі мұнай мемлекет пайдасына тәркіленген.