|
|
|
Қазақстан Республикасы Yкіметі мен Әзiрбайжан Республикасы Yкіметі арасындағы кеден iстеріндегі ынтымақтастық туралы
ҚР 1999 жылғы 30 желтоқсандағы № 15-II Заңымен ратификацияланды 2000 ж. 18 қаңтарда күшіне енді
Бұдан әрi «Жақтар» деп аталатын Қазақстан Республикасы Үкіметі мен Әзiрбайжан Республикасы Үкіметі достық қатынастарды, оның iшiнде кеден iстерi саласында ынтымақтасу жолымен дамытуды қалай отырып, кеден қызметтерiнiң ынтымақтасуы жолымен екi ел арасындағы жолаушылар мен жүк тасымалын дамыту мен жеделдетуге жәрдемдесуге ұмтыла отырып, кеден заңдарын сақтау, кеден ережелерінiң бұзылуына қарсы күрес Жақтардың мемлекеттерінің кеден қызметтерiнiң ынтымақтастығы кезiнде ойдағыдай жүзеге асырылады деп сене отырып төмендегiлер жөнiнде келiстi:
Анықтаулар
Осы Келiсімнiң мақсаттары үшiн келтiрiлетiн терминдер мынадай мағыналарды бiлдiредi: «кеден заңдары» - Жақтардың мемлекеттерiнiң кеден қызметтерiнің тауарларды әкелуге, әкетуге және жөнекей тасымалдаудың, жолаушылардың қол және салынатын жүктерiнiң валюталық және басқа да құндылықтарын, халықаралық почта жөнелтiлiмдерiнің, кеден баждары мен басқа да төлемдердің, жеңiлдiктер берудің, тиым салулар мен шектеулердi белгiлеудің, Жақтардың мемлекеттерiнiң кеден шекаралары арқылы тауарларды өткiзуге бақылау жасаудың тәртібін реттейтiн құқықтық нормаларының жиынтығы; «кеден қызметтерi» - Жақтардың мемлекеттерiнің орталық кеден органдары; «кеден ережелерiн бұзу» - кеден заңдарын бұзушылық немесе бұзуға ұмтылу; «тұлға» - заңды және жеке тұлға; «есiрткi заттар» - БҰҰ-ының кейiнгi өзгерістерi және толықтыруларымен 1961 жылғы Есiрткi дәрi-дәрмектерi туралы бiрыңғай конвенциясының тiзiмiне енгiзiлген заттар; «жүйке улағыш заттар» - БҰҰ-ының кейiнгi өзгерістерi және толықтыруларымен 1971 жылғы Жүйке улағыш заттар туралы конвенциясының тiзiмiне енгiзiлген заттар; «прекурсорлар» - халықаралық конвенцияларда Есiрткi дәрi-дәрмектерi мен жүйке улағыш заттарды өндiруде қолданылатын химиялық материалдар ретiнде жiктелiнетiн заттар мен олардың тұздары; «бақыланатын жеткiзiлiм» - есiрткi дәрi-дәрмектерi мен жүйке улағыш заттардың заңсыз айналымына қатысы бар адамдарды анықтау мақсаттарында Жақтардың құзiреттi органдарының бiлуiмен және қарауымен есiрткi дәрi-дәрмектерi мен жүйке улағыш заттардың заңсыз не заңсыздыққа күмән келтiретiн топтамаларының бiр Жақтың мемлекетi аумағына әкелiнуiне, әкетiлуiне және жөнекей тасымалдалуына жол берiлетiн әдiс.
Келісімнің қолданылу аясы
Осы Келісімнiң негiзiнде және кеден қызметтерiнiң көмегiмен олардың құзiреттерiнiң шегiнде Жақтардың мемлекеттерiнiң заңдарын сақтай отырып, Жақтар: а) Жақтар арасындағы жолаушылар мен жүк тасымалдауды жетiлдiру; б) кеден баждарын, алымдарын және басқа да төлемдердi дұрыс алуды, сондай-ақ кеден жеңілдiктерiн дұрыс қолдануды қамтамасыз ету; в) контрабанда кеден заңдарының бұзылуын болдырмау, тергеу мен жолын кесу мақсатында бiр-бiрiмен ынтымақтасатын болады.
Кеден нысандарын ресiмдеудi оңайлату
а) өзара келiсе отырып, кеден нысандарын ресiмдеудi оңайлату бойынша қажеттi шараларды қолданады; б) бiрiн-бiрi кедендiк қамтамасыз ету шарттарын (қорғасын мөртаңбалар, мөрлердiң iзтаңбалары, жай мөртаңбалар) және кедендiк құжаттарды мойындайды, ал қажет кезiнде өткiзiлетiн тауарларға өздерiнiң кедендiк қамтамасыз ету шарттарын қолданады. 2. Транзитпен өтетiн тауарлар мен көлiк құралдары Жақтардың мемлекеттерiнiң заңдарына сәйкес әкелу, әкету және жөнекей тасымалдауға тиым салынған не кеден заңдары бұзылды деуге негiз бар жағдайларды қоспағанда кеден тексеруiнен босатылады.
Куәлiктердi беру
1. Кеден қызметтерi сұрау бойынша бiр Жақтың аумағына әкелген не әкетiлген тауарлардың келесi Жақтың аумағына заң негiздерiнде әкелiнетiнiн не әкетiлiнетiнiн растайтын куәлiктердi бiр-бiрiне бередi. Куәлiктерде тауарлардың ресiмделiнген кедендiк процедураларының түрi мен нәтижелерi көрсетiледi. 2. Кеден қызметтерi сұрауы бойынша өздеріне бағынатын кеден органдарының ұсынған куәлiктерiнiң не құжаттарының шынайы екендiгi және барлық қажеттi деректердi қамтитыны туралы мәлiметтердi бiр-бiрiне бередi.
Есiрткi дәрi-дәрмектерi мен жүйке улағыш заттардың заңсыз айналымына қарсы күрес
1. Кеден қызметтерi алдын ала сұрау салусыз есiрткi дәрі-дәрмектерi мен жүйке улағыш заттардың, прекурсорлардың заңсыз айналымын болдырмау, тергеу мен жолын кесу жөніндегі әрекеттерiн жандандыру мақсатында бiр-бiрiне мүмкіндігінше қысқа мерзiмде: а) есiрткi дәрі-дәрмектерi мен жүйке улағыш заттардың, прекурсорлардың заңсыз айналымымен айналысатыны белгiлi немесе бұған күдiк келтiретiн тұлғалар туралы; б) есiрткi дәрі-дәрмектерi мен жүйке улағыш заттардың, прекурсорлардың заңсыз айналымы үшiн пайдаланылатыны белгiлi немесе бұған күдiк келтiретiн көлiк құралдары, контейнерлер мен пошталық жөнелтiлiмдер, сондай-ақ оларға бақылау жасаудың жаңа әдiстерi туралы мәлiметтердi хабарлайды. 2. Кеден қызметтерi алдын ала сұрау салусыз есiрткi дәрі-дәрмектерi мен жүйке улағыш заттардың, прекурсорлардың заңсыз айналымында қолданылатын тәсiлдер, сондай-ақ оларға бақылау жасаудың жаңа әдiстерi туралы мәлiметтердi бiр-бiрiне хабарлайды. 3. Осы баптың 1 және 2-тармақтарына сәйкес кез келген Жақтан алынған мәлiметтер, хабарлар мен құжатттар нашақорлықпен және есiрткi дәрі-дәрмектерi мен жүйке улағыш заттардың, прекурсорлардың заңсыз айналымымен айналысатын құқық қорғау және басқа да мемлекеттік органдарға берiлуi мүмкiн. 4. Жақтардың мемлекеттерiнiң заңдарының негiзiнде және өзара келiсе отырып, кеден қызметтерi қажет кезiнде есiрткi дәрі-дәрмектерi мен жүйке улағыш заттардың, прекурсорлардың заңсыз айналымына қатысы бар адамдарды анықтау мақсатында оларды жеткiзудің бақыланатын әдiсiн пайдаланады. Жеткiзудің бақыланатын әдiсiн пайдалану туралы шешiмдi әр нақты жағдайда Жақтар қабылдайды және олар қажет кезiнде Жақтардың қаржылық уағдаластығын ескере алады.
Мәлiметтердi беру
1. Кеден қызметтерi сұрау салу бойынша өздерiнде бар хабарларды, хаттамаларды, өзге де материалдарды немесе олардың куәлендiрiлген көшiрмелерiн салып жiберу жолымен: а) кеден төлемдерін, алымдарын және басқа да төлемдердi алуға, сонымен қатар кедендiк жеңiлдiктердi қолданумен байланысты жағдаяттар туралы; б) сұрау салатын Жақтың кеден заңдарына қайшы келетiн дайындалып жатқан немесе жасалынған әрекеттер туралы барлық мәлiметтердi бiр-бiрiне бередi. 2. Кеден қызметтерi алдын ала сұрау салусыз-ақ мүмкiндiгiнше қысқа мерзiм iшiнде кеден заңдарын бұзушылыққа қарсы күреске Жақтардың ерекше мүдделiлiгi бар заңдардың бұзылу мүмкiндiгi туралы барлық мәлiметтердi бiр-бiрiне хабарлайды. Бұл алдыңғы кезекте: а) қоршаған орта немесе халықтың денсаулығына қауiп төндiруi мүмкiн болатын тауарларды; б) қару-жарақты, оқ-дәрiнi, жарылғыш және улағыш заттарды, жарылғыш қондырғыларды; в) айтарлықтай тарихи, көркемдiк, мәдени немесе археологиялық құндылықтардың мәніндегі тауарларды; г) Жақтардың мемлекеттерiнiң заңдарына сәйкес ерекше маңызы бар және жоғары кеден баждарын, акциздерi мен басқа да салықтарды салуға жататын тауарларды өткiзуге қатысты болып келеді.
Құжаттарды беру
1. Жақтардың кеден қызметтерi кеден мәселелерi бойынша қолданылып жүрген заң не өзге де нормативтi актiлердің көшiрмелерiн бiр-бiрiне беретiн және кеден заңдарындағы барлық өзгерістер мен толықтырулар жайында бұдан әрi бiр-бiрiне дереу хабарлайтын болады. 2. Бiр Жақтың кеден қызметi келесi Жақтың кеден қызметiнiң сұрау салуы бойынша кеден ережелерiн қолдануға қатысты мәселелерi бойынша әкiмшiлiк органдарының шешiмдерiнiң көшiрмелерiн бередi. 3. Осы Келiсімнiң 11-бабының 2-тармағында «д» қосымша тармағында көзделген талаптан ерекшеленетiн құжаттарды беру туралы сұрау салуларда iстiң мәнi сипатталмауы да мүмкiн. 4. Құжаттарды алуды сұрау салған кеден қызметi алудың күнін көрсете отырып растайды.
Тәжiрибе алмасу мен көмек көрсету
а) өз қызметтерiнiң тәжiрибесi мен техникалық бақылау құралдарын қолдану туралы; б) кеден заңдарын бұзудың жаңа құралдары мен әдiстерi жайлы; в) екi Жақтың өзара мүдделiлiгiн тудыратын басқа да кеден мәселелерi бойынша ақпаратпен алмасады. 2. Кеден қызметтерi кеден iсi саласында: а) кеден қызметтерiнiң пайдаланатын техникалық көмек құралдарымен таныстыру мақсатында өзара мүдделiлiктi тудыратын жағдайларда қызметкерлермен алмасуды; б) қызметкерлердi оқытуды және олардың арнайы дағдыларын жетiлдiрудi; в) кеден мәселелерi бойынша сарапшылармен алмасуды; г) кеден мәселелерiне қатысты кәсiби, ғылыми және техникалық мәлiметтермен алмасуды қосқанда бiр-бiрiне көмек көрсетедi.
Тергеу
1. Бiр Жақтың кеден қызметi келесi Жақтың кеден қызметiнiң сұрау салуы бойынша осы Келісімнiң 2 бабының «б» және «в» тармақтарымен көзделген тексерудi немесе тергеудi жүргiзедi. Тексерудiң немесе тергеудiң нәтижелерi осы Келісімнiң 6-бабының 1-тармағында көзделген тәртібіне сәйкес сұрау салушы Жаққа хабарланады. 2. Тексеру мен тергеу сұрау салынатын Жақтың аумағында қолданылатын заңдарға сәйкес жүргiзiледi. Сұрау салынатын кеден қызметi өзiнiң жеке атынан тексеру мен тергеудi жүргiзедi. 3. Сұрау салынатын кеден қызметi сұрау салушы Жақтың лауазымды адамдарына осындай тексеру мен тергеуге қатысып отыруға рұқсат беруi мүмкiн. 4. Бiр Жақтың лауазымды адамдарының келесi Жақтың аумағында болған кезінде осы Келiсіммен көзделген жағдайларда өздерiнiң ресми өкiлеттiлiктерiнiң құжатпен расталуының болуы және нысанды киiмдi кимеуi, қару-жарақты алып жүрмеуi керек.
Сарапшылар мен куәгерлер
Бiр Жақтың сот немесе әкiмшiлiк органдары кеден заңдарының бұзылуына байланысты бұған сұрау салатын болса, келесi Жақтың кеден қызметi өз қызметкерлерiн осындай соттық немесе әкiмшiлiк талқыларға сарапшылар мен куәгерлер ретiнде шығып сөйлеуiне өкiлеттiк бере алады. Бұл қызметкерлер өздерiнің қызметтiк мiндеттерiн орындау кезiнде белгiлi болған фактiлер бойынша анықтамалар не қорытындылар бередi. Соттық немесе әкiмшiлiк талқыларға қатысқаны туралы сұрау салуда сұрау салынатын Жақтың қызметкерiнiң қандай iс бойынша және кiм болып келетiнi жөнiнде нақты көрсетiлуi тиiс.
Сұрау салудың нысаны мен мазмұны
1. Осы Келісімнің 9-бабының 1-тармағында көзделген сұрау салу жазбаша нысанда жiберiледi. Сұрау салуды орындауға қажеттi құжаттар түпнұсқаларында, ресми куәлендiрiлген көшiрмелерiнде не фото көшiрмелерiнде қоса тiркеледi. Сұрау салу: а) мүдделерi сұрау салудың негiзiнде жатқан кеден органының атауын; б) сұрау салудың мәнi мен себебiн; в) процедураның сипатын; г) процедураға қатысушылардың аты-жөндерi, мекен-жайлары мен өзге де деректердi; д) iстiң мәнi мен оның заңдық жағдаяттары туралы қысқаша сипаттама сияқты деректердi қамтуы қажет.
Сұрау салуларды орындау
1. Кеден қызметтерi өз Жағының заңдарына сәйкес өз құзiретi шегiнде сұрау салуларды орындауда бiр-бiрiне жәрдемдеседi. 2. Сұрау салуды орындау сұрау салынатын Жақтың мемлекетiнің егемендiгiне, қауiпсiздiгiне не заңдары мен халықаралық мiндеттемелерiне нұқсан келтiретiн болса, онда оны орындаудан бас тартылуы мүмкiн. 3. Сұрау салудан бас тартылғаны, сонымен қатар бас тартудың себептерi туралы сұрау салатын кеден қызметi жазбаша нысанда дереу хабарланады.
Құжаттар
1. Сұрау салу бойынша шынайы құжаттарды беру ресми куәлендiрiлген көшiрмелер не фотокөшiрмелер жеткiлiксiз болатын жағдайларда жүзеге асырылады. 2. Шынайы құжаттар сұрау салынатын кеден қызметiне мүмкiндiгiнше қысқа мерзiмде қайтарылуы тиiс. 3. Осы баптың ережелерін қолдану кезiнде сұрау салынатын Жақтың немесе осы Келісімге қатысушы болып табылмайтын Жақтың немесе мемлекеттің құқықтары мен заңды мүдделерiне қысым көрсетілмеуi тиiс.
Алынған мәлiметтер мен құжаттарды пайдалану
1. Кеден қызметтерi қаралып жатқан кеден заңдарының бұзылуына байланысты соттық не әкiмшiлiк талқыларында тексеру мен тергеулердi жүргiзу кезiнде өздерiнiң хабарларында, хаттамаларында, өзге де материалдарында айғақтар ретiнде осы Келісімге сәйкес алынған мәлiметтер мен құжаттарды пайдалана алады. Соттық не әкiмшiлiк талқыларындағы осы мәлiметтердi бағалау сұрау салатын Жақтың заңдарына сәйкес жүргiзiледi. 2. Сұрау салу бойынша ұсынылған мәлiметтер, хабарлар мен құжаттар осы Келісімдi орындау мақсатында ғана пайдаланылады және оларды басқа бiреулерге беруге не оларды берген кеден қызметiнің келісімiнсiз өзге мақсаттарда пайдалануға болмайды. 3. Осы баптың 2-тармағының ережелерi есiрткi дәрі-дәрмектерi мен жүйке улағыш заттардың, прекурсорлардың заңсыз айналымына байланысты бұзушылық туралы материалдарды қамтымайды. Мұндай ақпараттардың есiрткi заттардың заңсыз айналымымен айналысатын органдарына тiкелей берiлуi мүмкiн.
Шығыстарды өтеу
1. Сұрау салатын кеден қызметi сұрау салынатын кеден қызметiнде жұмыс iстемейтiн сарапшылар мен аудармашылардың жұмысына ақы төлеуге байланысты осы Келiсімдi орындау мақсатында орын алған шығыстарды сұрау салынатын кеден қызметiне өтейдi. 2. Осы Келісімнiң 8-бабының ережелерiн орындауға байланысты шығыстарды өтеу Жақтардың кеден қызметтерi арасындағы жеке уағдаластықтардың арнасы бола алады.
Келісімдi орындау
1. Осы Келісімде көзделген ынтымақтастықты кеден қызметтерi тiкелей жүзеге асырады. 2. Кеден қызметтерi өз құзiреттерiнің шегiнде осы Келісімдi орындауға қажетті нормативтi актiлердi шығарады. 3. Осы Келісімдi орындау үшiн Жақтардың кеден қызметтерi өз құзiреттерiнiң шегiнде екi жақты кеден қатынастарының күллi кешенi бойынша жеке-жеке келісімдердi жасай алады.
Қорытынды ережелер
1. Осы Келісімнің ережелері басқа халықаралық келісім-шарттарға сәйкес Жақтардың қабылдаған міндеттемелерiн қамтымайды. 2. Осы Келісім Жақтардың осы үшін қажетті мемлекет ішіндегi істерді орындағандары туралы соңғы мәлiмдеме жасалған күннен бастап күшiне енеді және Жақтардың бiрi оның әрекетін тоқтату туралы екіншісiне жазбаша мәлімдеме жiберген алты ай мерзім бiткенге дейін күшiнде қалады.
Алматы қаласында 1997 ж. 10 маусымда қазақ, әзірбайжан және орыс тілдерінде екі данада жасалынды, барлық мәтіндердің заңдық күші бірдей. Келісімнің ережелерін түсіндіру мақсатында орыс тіліндегі мәтін басым қолданылады.
Доступ к документам и консультации
от ведущих специалистов |