«Істің жан-жақты толық және объективті зерттелмеуі сот қаулыларын бұзуға, істі қайта қарауға негіз болды» Қазақстан Республикасы Жоғарғы Сотының қылмыстық істер жөніндегі қадағалаушы сот алқасының 2014 жылғы 25 қарашадағы № 2уп-124-14 қаулысынан үзінді

Істің жан-жақты толық және объективті зерттелмеуі сот қаулыларын бұзуға, істі қайта қарауға негіз болды
Қазақстан Республикасы Жоғарғы Сотының қылмыстық істер жөніндегі қадағалаушы сот алқасының 2014 жылғы 25 қарашадағы № 2уп-124-14 қаулысынан үзінді

Маңғыстау облысы қылмыстық істер жөніндегі мамандандырылған ауданаралық сотының 2014 жылғы 6 наурыздағы үкімімен:

Е., бұрын, Қазақстан Республикасы Қылмыстық кодексінің (бұдан әрі - ҚК) 101-бабының 1-бөлігімен кінәлі деп танылып, 3 жылға бас бостандығынан айыруға, ҚК-нің 257-бабы 2-бөлігінің «а» тармағымен кінәлі деп танылып, 2 жылға бас бостандығынан айыруға, ҚК-нің 58-бабының 2-бөлігіне сәйкес, қатаңдығы жеңілірек жазаны неғұрлым қатаң жазаға сіңіру жолымен, түпкілікті 3 жылға бас бостандығынан айыруға, жазасын жалпы режимдегі түзеу колониясында өтеуге сотталған.

К., бұрын сотталмаған, ҚК-нің 257-бабы 2-бөлігінің «а» тармағымен кінәлі деп танылып, 2 жылға бас бостандығынан айыруға сотталған, ҚК-нің 63-бабына сәйкес тағайындалған жазаны шартты деп есептеп, 2 жыл сынақ мерзімі тағайындалған.

Б., бұрын сотталмаған, ҚК-нің 257-бабы 2-бөлігінің «а» тармағымен кінәлі деп танылып, 2 жылға бас бостандығынан айыруға сотталған, ҚК-нің 63-бабына сәйкес, тағайындалған жазаны шартты деп есептеп, 2 жыл сынақ мерзімі тағайындалған.

Сотталғандардың әрқайсысынан жәбірленушінің заңды өкілі М.-ның пайдасына 1 000 000 теңге моральдық залал, 283 733 теңге материалдық шығын және мемлекет пайдасына 3 763 теңге мемлекеттік баж салығы өндірілген.

Маңғыстау облыстық соты қылмыстық істер жөніндегі апелляциялық сот алқасының 2014 жылғы 4 мамырдағы қаулысымен және Маңғыстау облыстық соты кассациялық сот алқасының 2014 жылғы 16 шілдедегі қаулысымен сот үкімі өзгеріссіз қалдырылған.