«Алматы облысының денсаулық сақтау басқармасы» мемлекеттік мекемесінің Ережесін бекіту туралы» Алматы облысы әкімдігінің 2016 жылғы 9 наурыздағы № 122 Қаулысы (күші жойылды)

«Алматы облысының денсаулық сақтау басқармасы» мемлекеттік мекемесінің Ережесін бекіту туралы
Алматы облысы әкімдігінің 2016 жылғы 9 наурыздағы № 122 Қаулысы

Алматы облысы әкімдігінің 2023 жылғы 27 желтоқсандағы № 459 Қаулысымен күші жойылды

«Мемлекеттік мүлік туралы» 2011 жылғы 1 наурыздағы Қазақстан Республикасы Заңының 17-бабы 7) тармақшасына және «Қазақстан Республикасы мемлекеттік органының үлгі ережесін бекіту туралы» 2012 жылғы 29 қазандағы № 410 Қазақстан Республикасы Президентінің Жарлығына сәйкес, Алматы облысының әкімдігі ҚАУЛЫ ЕТЕДІ:

1. Қоса беріліп отырған «Алматы облысының денсаулық сақтау басқармасы» мемлекеттік мекемесінің Ережесі бекітілсін.

2. «Алматы облысының денсаулық сақтау басқармасы» мемлекеттік мекемесінің басшысына осы қаулыны мемлекеттік тіркеуден өткен соң, ресми және баспа беттерінде, сондай-ақ Қазақстан Республикасы Үкіметі интернет-ресурста айқындаған және облыс әкімдігінің интернет-ресурстарында жариялау жүктелсін.

3. Осы қаулының орындалуын бақылау облыс әкімінің орынбасары Бахтияр Әлтайұлы Өнербаевқа жүктелсін.

4. Осы қаулы әділет органдарында мемлекеттік тіргелген күннен бастап күшіне енеді және алғашқы ресми жарияланған күнінен кейін күнтізбелік он күн өткен соң қолданысқа енгізіледі.

Алматы облысы әкімдігінің

2016 жылғы 9 наурыздағы

№ 122 қаулысымен бекітілген

«Алматы облысының денсаулық сақтау басқармасы» мемлекеттік мекемесінің
ЕРЕЖЕСІ

1. Жалпы ережелер

1. «Алматы облысының денсаулық сақтау басқармасы» мемлекеттік мекемесі тұрғындарды медициналық қызметпен қамтамасыз етуді ұйымдастыру саласында мемлекеттік басқару қызметіне және облыстың денсаулық сақтау жүйесіне басшылықты жүзеге асыратын жергілікті атқарушы орган болып табылады.

2. «Алматы облысының денсаулық сақтау басқармасы» мемлекеттік мекемесінің ведомстволары жоқ.