Кыргыз Республикасынын Жогорку Сотунун 2016-жылдын 19-декабрындагы № АД-168/16 МД токтому

Кыргыз Республикасынын Жогорку Сотунун 2016-жылдын 19-декабрындагы токтому

Иш № АД-168/16 МД

Көзөмөл өндүрүшү № 6-119/16 СА

Кыргыз Республикасынын Жогорку сотунун административдик жана экономикалык иштер боюнча соттук коллегиясы курамында:

төрагалык кылуучу: Боронбаева Д.С.,

судьялар: Арапбаев Н.М., Осмоналиев К.Т.,

сот отурумунун катчысы: Токтогазиев Р.,

тараптарсыз,

ачык соттук отурумда Ш.Акбарованын Жалал-Абад облусунун райондор аралык сотунун 2016-жылдын 13-апрелиндеги аныктамасына, Жалал-Абад облустук сотунун административдик жана экономикалык иштер боюнча соттук коллегиясынын 2016-жылдын 3-июнундагы аныктамасына карата келтирилген көзөмөл тартибиндеги даттануусун карап,

Кыргыз Республикасынын Жогорку сотунун судьясынын баяндамасын угуп,

ТАПТЫ:

Ф.Шериазданова сотко арыз менен кайрылып, анда Сузак айыл өкмөтүнүн 2002-жылдын 7-февралындагы № 2149 токтомун, Сузак райондук жерге жайгаштыруу жана кыймылсыз мүлккө укуктарды каттоо башкармалыгы тарабынан 2016-жылдын 24-февралында А.Акбаровдун атына даярдалган техникалык паспортун жараксыз деп таап берүүнү сураган. Ошону менен бирге Ф.Шериазданова арызды камсыз кылуу жөнүндө арызы менен кайрылган.

Жалал-Абад облусунун райондор аралык сотунун 2016-жылдын 13-апрелиндеги аныктамасы менен Ф.Шериазданованын арызды камсыз кылуу жөнүндөгү арызы канааттандырылган. Сузак районунун Сузак айылынын Больничная көчөсүнүн № 19 үйүнүн тургундары Ш.Акбаровго жана Ш.Акбаровага аталган даректеги жер участкасына бул талаш чечилип бүткөнгө чейин курулуштарды курууга, айрым иш-аракеттерди жасоого тыюу салынган. Сузак районунун Сузак айылынын Больничная көчөсүндө жайгашкан А.Акбаровдун атында 3-05-11-1001-1338 сандуу сыр белгиси менен катталган турак-жай Ф.Шериазданованын арызы чечилгенге чейин камакка алынган

(судья Абдыкадыров К.А.).