Кыргыз Республикасынын Жогорку Сотунун 2016-жылдын 9-февралындагы № АД-142/15МН токтому

Кыргыз Республикасынын Жогорку Сотунун 2016-жылдын 9-февралындагы токтому

Иш № АД-142/15МН

Көз. өнд. № 6-12/16 АД

Кыргыз Республикасынын Жогорку сотунун административдик жана экономикалык иштер боюнча соттук коллегиясы курамында:

төрагалык кылуучу: Осмоналиев К.Т.,

судьялар: Акматов Б.Дж., Джумашов К.О.,

сот отурумунун катчысы: Жаныбек уулу Адил,

тараптардан: Кочкор райондук кадастр жана кыймылсыз мүлккө укуктарды каттоо башкармалыгынын өкүлү Т.Абдылдаевдин (2016-жылдын 4-февралындагы ишеним каттын негизинде), А.Сагынбековдун, анын өкүлү К.Шамурзаевдин (2015-жылдын 4-майындагы ишеним каттын негизинде) катышуусунда,

соттук ачык отурумда С.Карагулованын Нарын областынын райондор аралык сотунун 2015-жылдын 25-сентябрындагы аныктамасына жана Нарын областтык сотунун административдик жана экономикалык иштер боюнча соттук коллегиясынын 2015-жылдын 12-ноябрындагы аныктамасына карата келтирилген көзөмөл тартибинде даттануусун карап чыгып,

Нарын областынын райондор аралык сотунун 2015-жылдын 25-сентябрындагы аныктамасы менен С.Карагулованын Кочкор айыл өкмөтүнүн 2011-жылдын 16-майындагы № 132 буйругун жараксыз деп таап, Кочкор айылы Шамен көчөсү № 29 жайгашкан жети сотых жер тилкесин калыбына келтирип берүү жөнүндөгү арызы боюнча иш өндүрүштөн жүргүзүүсү токтотулган

(төрагалык кылган: Ташмамбетов Т.),

Нарын областтык сотунун административдик жана экономикалык иштер боюнча соттук коллегиясынын 2015-жылдын 12-ноябрындагы аныктамасы менен Нарын областынын райондор аралык сотунун 2015-жылдын 25-сентябрындагы аныктамасы өзгөртүүсүз калтырылган. Апелляциялык тартиптеги даттануу канааттандыруусуз калтырылган

(төрагалык кылган жана баяндамачы судья: З.Амиракулова, судьялар: М.Байышов, А.Орозалиев),

ТАПТЫ:

С.Карагулова Кочкор айыл өкмөтүнө, А.Сагынбековго, Кочкор райондук мамлекеттик каттоо башкармалыгына карата Кочкор айылынын Шамен көчөсүнүн № 27 турак жайынын жашоочусу А.Сагынбековдун арызы боюнча анын турак жайынын орду, жанындагы жер аянты такталып, 0,0566,58 га жер аянтты жеке менчигине бекитүү жөнүндөгү Кочкор айыл өкмөтүнүн 2011-жылдын 16-майындагы № 132 буйругун жокко чыгаруу, Кочкор айылы Шамен көчөсү № 29 жайгашкан турак жайдын жер тилкесин калыбына келтирип берүү жөнүндөгү арыз менен сотко кайрылган.

Соттор тарабынан жогоруда көрсөтүлгөн соттук актылар кабыл алынган.