Кувейт Мемлекетінің аумағындағы жарылмаған оқ-дәрілерді жою және сумен қамтамасыз ету пункттерін жабдықтау, сондай-ақ суды тазарту жөнінде Қазақстан Республикасы Қарулы Күштерінің инженерлік-саперлік отрядының Кувейт Мемлекетіне көмек беруі туралы Қазақстан Республикасы мен Кувейт Мемлекеті арасындағы хаттар алмасу нысанындағы) Келісім

Жоба

Кувейт Мемлекетiнiң аумағындағы жарылмаған оқ-дәрiлердi жою және сумен
қамтамасыз ету пункттерiн жабдықтау, сондай-ақ суды тазарту жөнiнде
Қазақстан Республикасы Қарулы Күштерiнiң инженерлiк-саперлiк отрядының
Кувейт Мемлекетiне көмек беруi туралы Қазақстан Республикасы мен Кувейт
Мемлекетi арасындағы хаттар алмасу нысанындағы) Келісім

Осы келісімді бекіту туралы ҚР Президентінің Жарлығының жобасы Қазақстан Республикасының Президентінің қарауына ҚР Үкіметінің 06.08.03 ж. № 783 қаулысына сәйкес енгізілді

Жоғары Мәртебелi,

Шейх Джабер Әл-Мубарак Ах-Хамад Ас-Сабахқа

Кувейт Мемлекетiнiң Вице-Премьер-Министрi,

Қорғаныс министрi

Эль-Кувейт қаласы

2003 жылғы "__"_______

N _______

Жоғары Мәртебелi,

Мен Кувейт Мемлекетiнде Қазақстан Республикасы Қарулы Күштерiнiң инженерлiк-саперлiк отрядының болуына қатысты және оны Қазақстан Республикасының Кувейт Мемлекетiнiң аумағында орналастыруына байланысты Қазақстан Республикасы мен Кувейт Мемлекетi өкiлдерiнiң арасында болған келiссөздерге сiлтеме жасауды өзiме абырой санаймын.

Бiздiң екi мемлекетiмiздiң арасындағы берiк және ұзақ мерзiмдi байланыстарды, сондай-ақ Кувейт Мемлекетiнiң аумағында жарылмаған оқ-дәрiлердi жою және сумен қамтамасыз ету пункттерiн жабдықтау, сондай-ақ суды тазалау жөнiнде Қазақстан Республикасының көмек беруiне Кувейт Мемлекетiнiң мүдделiлiгiн назарға ала отырып, мен Кувейт Мемлекетiнiң аумағында жарылмаған оқ-дәрiлердi жою және сумен қамтамасыз ету пункттерiн жабдықтау, сондай-ақ суды тазалау жөнiнде Қазақстан Республикасы Қарулы Күштерiнiң инженерлiк-саперлiк отрядының Кувейт Мемлекетiне көмек беруi туралы Қазақстан Республикасы мен Кувейт Мемлекеті арасында (бұдан әрi - Тараптар) мынадай мазмұнда келісім жасасуды ұсынуды өзiме абырой санаймын:

1. Анықтама

Осы Келісімде қолданылатын терминдер:

а) Отряд - Қазақстан Республикасының Қарулы Күштерi штабтары бастықтарының комитетi қолбасшылық жасайтын Қазақстан Республикасы Қарулы Күштерiнiң инженерлiк-саперлiк отряды;