«Қазақстан Республикасының азаматтарына паспорттар, жеке куәліктер беру» мемлекеттік көрсетілетін қызмет регламенті (Қазақстан Республикасы Ішкі істер министрінің 2014 жылғы 20 наурыздағы № 165 бұйрығына 1-қосымша) (2014.27.06. берілген өзгерістермен) (күші жойылды)

ҚР Ішкі істер министрінің 2015 жылғы 30 мамырдағы № 501 бұйрығымен күші жойылды

Қазақстан Республикасы

Ішкі істер министрінің

2014 жылғы 20 наурыздағы

№ 165 бұйрығына

1-қосымша

«Қазақстан Республикасының азаматтарына паспорттар, жеке куәліктер беру»

мемлекеттік көрсетілетін қызмет регламенті

(2014.27.06. берілген өзгерістермен)

1. Жалпы ережелер

1. «Қазақстан Республикасының азаматтарына паспорттар, жеке куәліктер беру» мемлекеттік көрсетілетін қызметтің осы регламенті (бұдан әрі - Регламент) Қазақстан Республикасының «Мемлекеттік көрсетілетін қызметтер туралы» 2013 жылғы 15 сәуірдегі Заңының 10-бабының 2-тармағына және Қазақстан Республикасы Үкіметінің 2014 жылғы 24 ақпандағы № 132 қаулысымен бекітілген «Қазақстан Республикасының азаматтарына паспорттар, жеке куәліктер беру» мемлекеттік көрсетілетін қызмет стандартына (бұдан әрі - Стандарт) сәйкес әзірленді және Қазақстан Республикасының азаматтарына паспорттар, жеке куәліктер беру рәсімін айқындайды.

2. Мемлекеттік қызметті көрсетілетін қызметті алушының тұрақты тіркеу орны бойынша Ішкі істер министрлігінің аумақтық көші-қон полициясы бөліністері Министрліктің - mvd.gov.kz интернет-ресурсында, «Ішкі істер органдарының қызметі туралы» бөлімінде (бұдан әрі - көрсетілетін қызметті беруші) көрсетілген мекенжайлар бойынша көрсетеді.

3. Мемлекеттік қызмет көрсету нысаны: электронды (ішінара автоматтандырылған) және (немесе) қағаз түрінде.

4. Мемлекеттік қызмет көрсету нәтижесі Қазақстан Республикасы азаматының паспорты және (немесе) жеке куәлігін беру болып табылады.

Мемлекеттік қызмет көрсету нәтижесін ұсыну нысаны: қағаз түрінде.

2. Мемлекеттік қызмет көрсету процесінде көрсетілетін қызметті
берушінің құрылымдық бөліністерінің (қызметкерлерінің) іс-қимыл
жасау тәртібінің сипаттамасы