(БҰРЫНҒЫ РЕДАКЦИЯ) «ҚАЗАҚСТАН РЕСПУБЛИКАСЫ ЖОҒАРҒЫ СОТЫНЫҢ КЕЙБІР НОРМА...

Қазақстан Республикасы Жоғарғы Сотының кейбір нормативтік қаулыларына өзгерістер мен толықтырулар енгізу туралы
Қазақстан Республикасы Жоғарғы Сотының 2011 жылғы 30 желтоқсандағы № 5 Нормативтік қаулысы

Осы редакция 2016 жылғы 25 қарашада енгізілген өзгерістеріне дейін қолданылды

Қазақстан Республикасы заңнамасының өзгеруіне және сот практикасын одан әрі қалыптастырудың қажеттілігіне байланысты Қазақстан Республикасы Жоғарғы Сотының жалпы отырысы

қаулы етеді:

I. Қазақстан Республикасы Жоғарғы Сотының мынадай нормативтік қаулыларына өзгерістер мен толықтырулар енгізілсін:

1. «Мүлікті тыйым салудан босату туралы істер жөніндегі сот практикасы туралы» 1975 жылғы 24 наурыздағы № 2 нормативтік қаулыға, Қазақстан Республикасы Жоғарғы Соты Пленумының 1978 жылғы 21 қыркүйектегі № 18, 1987 жылғы 2 қазандағы № 11, 1988 жылғы 23 қыркүйектегі № 7, 1998 жылғы 15 мамырдағы № 5 қаулыларымен және Қазақстан Республикасы Жоғарғы Сотының 2004 жылғы 18 маусымдағы № 13 нормативтік қаулысымен енгізілген өзгерістерімен бірге:

1) мынадай мазмұндағы 1-1-тармақпен толықтырылсын:

«1-1. Азаматтық сот ісін жүргізу тәртібінде өндiрiп алушының, борышкердің және үшінші тұлғаның мүліктік құқықтарын қорғау сот орындаушысының әрекетіне (әрекетсіздігіне) шағымдану тәртібінде немесе талап қою тәртібінде жүзеге асырылады.

Атқарушылық іс жүргізу процесінде мүлікке тыйым салу кезінде сот орындаушысының әрекетіне (әрекетсіздігіне) немесе осындай әрекеттерді жасаудан бас тартуға өндiрiп алушы немесе борышкер және басқа тұлғалар шағым беруі мүмкін, шағым Қазақстан Республикасы Азаматтық іс жүргізу кодексінің (бұдан әрі - АІЖК) 240-5-бабында көзделген тәртіпте қаралуға жатады.

Өндiрiп алынатын мүлiктiң тиесiлiлігiне байланысты азаматтық құқық туралы даулар талап қою ісін жүргізу тәртібінде қаралады (АІЖК-нің 240-6-бабының бірінші бөлігі)»;

2) 2-тармақтың соңғы сөйлемі алып тасталсын;

3) 3-тармақ «қысқарту» деген сөздің орнына «қысқартуға жол берілмейді, өйткені» деген сөздермен толықтырылсын;