|
Осы редакция 2008 жылғы 12 қарашадағы енгізілген өзгерістеріне дейін қолданылды
ҚР Үкіметінің 20.01.03 ж. № 55 қаулысымен (бұр. ред. қара); 17.03.04 ж. № 322 қаулысымен (бұр. ред. қара) қаулысымен ;ҚР Үкіметінің 2007.19.12 № 1242 Қаулысымен (2008 жылғы 1 маусымнан бастап қолданысқа енгізілді) (бұр.ред. қара) ереже жаңа редакцияда Қазақстан Республикасы Үкіметінің 2001 жылғы 19 маусымдағы № 836 қаулысымен бекітілген Қазақстан Республикасына шетелдік жұмыс күшін тартуға
1. Осы Қазақстан Республикасына шетелдік жұмыс күшін тартуға квота белгілеу ережесі, жұмыс берушілерге рұқсат берудің шарттары мен тәртібі (бұдан әрі - Ереже) "Халықты жұмыспен қамту туралы" Қазақстан Республикасының 2001 жылғы 23 қаңтардағы Заңына сәйкес әзірленді және Қазақстан Республикасына шетелдік жұмыс күшін тартуға квота белгілеудің және бөлудің тәртібін, жұмыс берушілерге рұқсат берудің шарттары мен тәртібін белгілейді. 2. Осы Ережеде мынадай негізгі ұғымдар пайдаланылады: 1) шетелдік жұмыс күші (шетелдік қызметкерлер) - Қазақстан Республикасы аумағында еңбек қызметін жүзеге асыру үшін жұмыс беруші тартатын шетелдіктер мен азаматтығы жоқ адамдар; 2) жұмыс беруші - қызметкермен еңбек қатынастарында болатын жеке немесе заңды тұлға; 3) шетелдік жұмыс күшін тартуға арналған рұқсат (бұдан әрі - рұқсат) - осы Ереженің 19-тармағында көзделген жағдайларды қоспағанда, уәкілетті орган жұмыс берушіге орталық атқарушы орган бөлген квота шегінде, Қазақстан Республикасына шетелдік қызметкерді бір жұмыс жылынан аспайтын мерзімге тартуға беретін 1-қосымшаға сәйкес белгіленген нысандағы құжат; 4) шетелдік жұмыс күшін тартуға арналған квота (бұдан әрі - квота) - республиканың экономикалық белсенді халқының санына шаққандағы процентпен алынған шетелдік жұмыс күшінің Қазақстан Республикасының Үкіметі жыл сайын белгілейтін үлесі; 5) бос жұмыс орны - жұмыс берушідегі бос жұмыс орны (қызмет); 6) орталық атқарушы орган - халықты жұмыспен қамту саласындағы мемлекеттік саясатты жүзеге асыруды үйлестіретін мемлекеттік орган; 7) уәкілетті орган - жергілікті атқарушы орган; 8) маусымдық ауыл шаруашылық жұмыстары - табиғат және ауа райы жағдайларына байланысты белгілі бір кезеңнің (маусымның) ішінде орындалатын ауыл шаруашылық жұмыстары. 3. Осы Ереженің күші азаматтығы жоқ тұлғаларға және шетелдіктерге: 1) шетелдік заңды тұлғалар филиалдарының немесе өкілдіктерінің бірінші басшылары болып істейтін; 2) мерзімі бір күнтізбелік жыл ішіндегі жиынтығы 60 күнтізбелік күннен аспайтын іссапарда жүрген; 3) Қазақстан Республикасының заңды тұлғасына, шетелдік заңды тұлғалардың филиалдары мен өкілдіктеріне шартқа сәйкес 60 күнтізбелік күннен асатын мерзімге іссапарға келген. Уәкілетті орган растаған 2-қосымшаға сәйкес тізім бойынша шетелдіктерді Қазақстан Республикасының заңды тұлғасына, нақты кәсіптер (мамандықтар) бойынша шетелдік заңды тұлғалардың филиалдары мен өкілдіктеріне 60 күнтізбелік күннен асатын мерзімге іссапарға жіберуге осындай санда қазақстандық персоналды кәсіптік даярлау, қайта даярлау және біліктілігін арттыру немесе осындай санда қазақстандық азаматтарды шетелдік заңды тұлға орналасқан мемлекеттің оқу орындарына оқытуға жіберу мақсатында жіберілуге жол беріледі. Іссапардың мерзімі 180 күнтізбелік күннен аспауы тиіс. 4) Қазақстан Республикасының Үкіметімен ақшалай баламасы 50 миллион АҚШ долларынан астам инвестиция сомасына келісім-шарттар жасасқан ұйымдардың бірінші басшылары және қызметтің басым түрлерінде инвестициялық қызметті жүзеге асыратын әрі инвестициялар жөніндегі уәкілетті органмен келісім-шарт жасасқан Қазақстан Республикасының заңды тұлғаларының бірінші басшылары болып жұмыс істейтін; 5) дипломатиялық өкілдіктер мен халықаралық ұйымдардың қызметкерлері, Қазақстан Республикасында аккредиттелген консулдық мекемелердің қызметкерлері болып табылатын; 6) қайырымдылық, ізгілік көмек көрсету және грант ұсыну жөніндегі Қазақстан Республикасының халықаралық шарттары шеңберінде келген; 7) Қазақстан Республикасында акредиттелген шетелдік бұқаралық ақпарат құралдарының өкілдері болып табылатын; 8) шетелдік ұйымдарға тиесілі өзен кемелері, әуе, темір жол және автомобиль көлігі экипаждарының мүшелері болып табылатын; 9) әртіс, режиссер, дирижер, хормейстер, балетмейстер, суретші, репетитор, спортшы мен жаттықтырушы болып жұмыс істейтін; 10) Қазақстан Республикасында тұрақты тұратын; 11) Қазақстан Республикасының аумағында босқын мәртебесін немесе саяси баспана алған; 12) Қазақстан Республикасының оқу орындарында күндізгі оқу бөлімінде оқитын және сонымен қатар оқудан бос уақытында жұмыс істейтін; 13) білім беру саласындағы ынтымақтастық туралы Қазақстан Республикасының халықаралық шарттарына сәйкес Қазақстан Республикасының жалпы орта, техникалық және кәсіптік, орта білімнен кейінгі және жоғары білім беру ұйымдарында, педагогикалық қызметті жүзеге асырып жүрген бірақ ұйым штатының 25 пайызынан асырмай; 14) оралмандарға; 15) аэроғарыш қызметі саласындағы ынтымақтастық туралы Қазақстан Республикасының халықаралық шарттары шеңберінде тартылатын ғарыштық зымыран кешенін жасау және жердегі ғарыш инфрақұрылымы объектілерін пайдалану жөніндегі мамандар болып табылатын; ҚР Үкіметінің 2008.29.08. № 792 Қаулысымен 16) тармақша өзгертілді (2008 жылғы 1 маусымнан бастап қолданысқа енгізілді) 16) Алматы қаласының өңірлік қаржы орталығында басшылар және мамандар лауазымында жұмыс істейтін Қазақстан Республикасының заңнамасында белгіленген тәртіппен расталған құжаттары бар орта білімнен кейінгі және жоғары білімді шетелдіктер мен азаматтығы жоқ. Осы тармақтың 1), 4), 8), 9), 12), 13) және 15) тармақшаларына сәйкес шетелдіктер мен азаматтығы жоқ адамдарды жұмысқа тарту кезінде жұмыс беруші уәкілетті органға 3-қосымшаға сәйкес нысандағы ақпаратты ұсынады. Шетелдіктерді шетелдік заңды тұлғалардың филиалдары мен өкілдіктерінің басшылары ретінде жұмысқа тарту кезінде көрсетілген ақпаратқа филиалды, өкілдікті басқаруға шетелдік заңды тұлға берген сенімхаттың көшірмесі қоса беріледі. ҚР Үкіметінің 2008.29.08. № 792 Қаулысымен 17) тармақшамен толықтырылды (2008 жылғы 1 маусымнан бастап қолданысқа енгізілді) 17) Орталық Азия өңірлік экологиялық орталығында жұмыс істейтін, өз қызметін Орталық Азия өңірлік экологиялық орталығы жұмысының шарттары туралы келісімнің негізінде жүзеге асыратын адамдарға қолданылмайды.
2. Квота белгілеудің және бөлудің тәртібі
4. Уәкілетті орган ішкі еңбек рыногын талдау және жұмыс берушілердің бірінші қыркүйекке дейін жолданатын өтінімдері негізінде жұмыс берушінің алдағы жылға арналған шетелдік жұмыс күшін тарту негіздемесін 4-қосымшаға сәйкес орталық атқарушы органға жыл сайын бірінші қазанға дейінгі мерзімде ұсынады. 5. Мүдделі мемлекеттік органдар шетелдік жұмыс күшін тартуға арналған квота белгілеу жөніндегі ұсыныстарын орталық атқарушы органға жыл сайын бірінші қазанға дейінгі мерзімде енгізе алады. 6. Орталық атқарушы орган уәкілетті органдар мен мүдделі мемлекеттік органдардың ұсыныстары негізінде алдағы жылға арналған квота белгілеу туралы Қазақстан Республикасының Үкіметі шешімінің жобасын Қазақстан Республикасының Үкіметіне жыл сайын бірінші желтоқсанға дейін енгізеді. 7. Орталық атқарушы орган Қазақстан Республикасының Үкіметі квота белгілеу туралы шешім қабылдағаннан кейін оны он бес күнтізбелік күн ішінде еңбек рыногындағы ахуалды, өндірісті дамыту және инвестициялық жобаларды, оның ішінде шетелдік капиталды қатыстыра отырып іске асыру, сондай-ақ прогрессивті шетелдік технологияларды енгізу үшін тиісті облыс, Астана және Алматы қалалары экономикасының жұмыс күшіне деген қажеттілігін ескере отырып, облыстардың, Астана және Алматы қалаларының арасында таратып бөледі. 8. Уәкілетті органдар жұмыс берушілердің ұсыныстары негізінде шетелдік жұмыс күшін тартуды қажет ететін жұмыс көлемі ұлғайған жағдайда орталық атқарушы органға ағымдағы жылға арналған квотаны көбейту туралы ұсынысты енгізе алады. 9. Орталық атқарушы орган мүдделі мемлекеттік немесе уәкілетті органдардың ұсыныстары негізінде бекітілген квотаны облыстардың, Астана және Алматы қалаларының арасында Қазақстан Республикасының Үкіметі белгілеген квота шегінде қайта бөлуді жүзеге асыра алады.
3. Рұқсат берудің шарттары мен тәртіптері және оны беруден бас тарту, өтінімді тоқтату және ұзарту
10. Шетелдік жұмыс күшін тартуға арналған рұқсат қызметкерлердің мынадай санаттарына: 1) бірінші санат - жоғары білімі мен тиісті қызмет саласындағы басшылық лауазымдарда кемінде бес жыл жұмыс өтілі бар бірінші басшыларды тартуға; 2) екінші санат - басшылар, мамандар мен басқа да қызметшілер лауазымдарының біліктілік анықтамалығында белгіленген біліктілік талаптарына сәйкес келетін басшылар мен мамандарды тартуға; 3) үшінші санат - жұмысшылардың жұмыстары мен кәсіптерінің бірыңғай тарифтік-біліктілік анықтамалығына, жұмысшылар кәсіптерінің тарифтік-біліктілік сипаттамаларына сәйкес тиісті кәсіптік білімі мен жұмыс стажы бар білікті жұмысшыларды тартуға; 4) төртінші санат - еңбек көші-қоны және еңбекші мигранттарды әлеуметтік қорғау саласындағы ынтымақтастық туралы халықаралық шарттарға сәйкес маусымдық ауыл шаруашылығы жұмыстарымен айналысатын жұмысшыларды тартуға беріледі. 11. Уәкілетті орган рұқсатты, бос жұмыс орындары болған және жұмыс күшіне сұранысты ішкі еңбек рыногы есебінен қанағаттандыру мүмкіндігі болмаған кезде, орталық атқарушы орган бөлген квота шегінде береді. Ішкі еңбек рыногында лайықты үміткерлерді іздестіру жұмыс берушінің республикалық және жергілікті мерзімдік басылымдарда бос жұмыс орындары туралы хабарландыру жариялауы және уәкілетті органның республикалық және өңірлік деректер қорынан бос лауазымдар жөніндегі ұсыныстарды қарауы жолымен жүзеге асырылады. 12. Ішкі еңбек рыногында іздестіру: 1) жарғылық қорында шетелдік заңды және (немесе) жеке тұлғалардың қатысу үлесі кемінде 50 %-ды құрайтын Қазақстан Республикасы заңды тұлғаларының бірінші басшыларын; 2) акцияларының кемінде 50 %-ы мемлекетке немесе шетелдік заңды немесе жеке тұлғаларға тиесілі Қазақстан Республикасының акционерлік қоғамдары директорлары кеңесінің мүшелерін; 3) жоғары оқу орындары мен ғылыми ұйымдардың оқытушылары мен ғылыми қызметкерлерін; 4) "Қазақстанның 30 корпоративтік көшбасшысы" бағдарламасы шеңберінде жобаларды іске асыруға қатысатын ұйымдардың шетелдік қызметкерлерін; 5) теңіз кемелері экипаждарының мүшелерін; 6) еңбек көші-қоны және еңбекші мигранттарды әлеуметтік қорғау саласындағы ынтымақтастық туралы халықаралық шарттарға сәйкес маусымдық ауыл шаруашылығы жұмыстарымен айналысатын жұмысшыларды тартқан кезде жүзеге асырылмайды. 13. Рұқсат беру мәселесінің шешімін уәкілетті орган тартылатын шетелдік қызметкерлердің біліктілік сипаттамаларын бағалау өлшемдері негізінде қабылдайды. 14. Уәкілетті орган тартылатын шетелдік қызметкерлердің біліктілік сипаттамаларын бағалауды жұмыс беруші ұсынған құжаттарды талдау негізінде жүргізеді. 15. Тартылатын шетелдік қызметкердің өлшемдеріне сәйкес мынадай баллдар есептеледі: 1) білімі: шетелдік қызметкердің өзі үміткер лауазымға жұмысқа тұруы үшін қажетті мамандық бойынша ғылыми дәрежесі немесе жоғары білімі - 25 балл; жоғары білім - 20 балл; техникалық және кәсіптік білім - 15 балл; 2) ұйым қызметінің негізгі түріне сәйкес қызмет саласындағы мамандығы бойынша жұмыс стажы: 1-3 жыл - 15 балл; 4-6 жыл - 20 балл; 7 және одан да көп - 25 балл. 3) жыл сайын жергілікті атқарушы органдардың ұсыныстары негізінде орталық атқарушы орган белгілейтін тізімге сәйкес еңбек рыногында нақты мамандыққа (кәсіпке) сұраныстың болуы (болмауы): сұранысқа ие мамандық (кәсіп) - 25 балл; сұраныс жоқ мамандық (кәсіп) - 15 балл. Осы Ереженің 15-тармағының 3) тармақшасы бірінші санат бойынша тартылатын шетелдік қызметкерлерге қолданылмайды. 16. Тартылатын шетелдік қызметкердің біліктілік сипаттамасын бағалау нәтижелерінің ең төменгі мәні: бірінші санат бойынша - 35 баллды; екінші санат бойынша - 55 баллды; үшінші санат бойынша - 55 баллды құрайды. 17. Тартылатын шетелдік қызметкерге оның біліктілік сипаттамасын бағалау нәтижелері бойынша 5-қосымшаға сәйкес жеке анықтама жасалады. 18. Еңбек көші-қоны және еңбекші мигранттарды әлеуметтік қорғау саласындағы ынтымақтастық туралы халықаралық шарттарға сәйкес маусымдық ауыл шаруашылығы жұмыстарына жұмысшылар ретінде тартылатын шетелдік қызметкерлерге біліктілік сипаттамаларын бағалау жүзеге асырылмайды. 19. Рұқсат шетелдік жұмыс күшін: жарғылық қорында шетелдік заңды және (немесе) жеке тұлғалардың қатысу үлесі кемінде 50 %-ды құрайтын Қазақстан Республикасы заңды тұлғаларының бірінші басшылары; акцияларының кемінде 50 %-ы мемлекетке не шетелдік заңды немесе жеке тұлғаларға тиесілі Қазақстан Республикасының акционерлік қоғамдарының директорлары кеңесінің мүшелері ретінде тартқан кезде еңбек шартының қолданылу мерзіміне беріледі. 20. Уәкілетті орган рұқсаттарды беру кезінде жұмыс берушіге онымен алдын ала жасалған жазбаша келісім бойынша 6-қосымша сәйкес мынадай ерекше шарттардың кез келгенін орындауды: 1) кейіннен шетелдік жұмыс күшін қазақстандық кадрлармен алмастыра отырып, шетелдік жұмыс күші тартылатын мамандықтар бойынша немесе еңбек рыногында сұранысқа ие мамандықтар бойынша Қазақстан Республикасының азаматтарын кәсіптік даярлауды немесе қайта даярлауды; 2) кейіннен шетелдік жұмыс күшін қазақстандық кадрлармен алмастыра отырып, Қазақстан Республикасы азаматтарының біліктілігін арттыруды; 3) шетелдік жұмыс күшін қазақстандық кадрлармен алмастыруды; 4) орындалатын жұмыстың көлемі ұлғайған кезде қазақстандық азаматтар үшін қосымша жұмыс орындарын құруды жүктейді. Ерекше шарттарды жүктеу жұмыс беруші тартқан шетелдік қызметкерлердің жалпы саны ескеріле отырып жүзеге асырылады. Жұмыс берушілерге: 50-ден артық шетелдік қызметкерді тартатын жұмыс берушілерге осы Ереженің 20-тармағының 1), 2) және 3) тармақшаларында көзделген ерекше шарттар; 10-нан 50-ге дейін шетелдік қызметкерді тартатын жұмыс берушілерге осы Ереженің 20-тармағының 2) және 3) тармақшаларында көзделген ерекше шарттар; 10-нан кем шетелдік қызметкерді тартатын жұмыс берушілерге осы Ереженің 20-тармағының 2) тармақшасында көзделген ерекше шарттар жүктеледі. Осы Ереженің 20-тармағының 4) тармақшасында көзделген ерекше шарттар жұмыс берушідегі орындалатын жұмыстың көлемі ұлғайған кезде жүктеледі. Осы тармақтың шарттары шетелдік жұмыс күшін: жарғылық қорында шетелдік заңды және (немесе) жеке тұлғалардың қатысу үлесі кемінде 50 %-ды құрайтын Қазақстан Республикасы заңды тұлғаларының бірінші басшылары; акцияларының кемінде 50 %-ы мемлекетке не шетелдік заңды немесе жеке тұлғаларға тиесілі Қазақстан Республикасы акционерлік қоғамдарының директорлары кеңесінің мүшелері; еңбек көші-қоны және еңбекші мигранттарды әлеуметтік қорғау саласындағы ынтымақтастық туралы халықаралық шарттарға сәйкес маусымдық ауыл шаруашылығы жұмыстарына жұмысшылар ретінде тартатын жұмыс берушілерге қолданылмайды. 21. Жұмыс беруші немесе ол уәкілеттік берген тұлға бірінші және екінші санат бойынша шетелдік жұмыс күшін тартуға рұқсат алу үшін шетелдік жұмыс күшінің еңбек қызметі жүзеге асырылатын жері бойынша уәкілетті органға осы Ережеге 8-қосымшада көрсетілген құжаттар қоса берілетін 7-қосымшаға сәйкес өтінішті ұсынады. 22. Жұмыс беруші немесе ол уәкілеттік берген тұлға үшінші санат бойынша шетелдік жұмыс күшін тартуға рұқсат алу үшін шетелдік жұмыс күшінің еңбек қызметі жүзеге асырылатын жері бойынша уәкілетті органға осы Ережеге 9-қосымшада көрсетілген құжаттар қоса берілетін 7-қосымшаға сәйкес өтінішті ұсынады. 23. Жұмыс беруші немесе ол уәкілеттік берген тұлға төртінші санат бойынша шетелдік жұмыс күшін тартуға рұқсат алу үшін шетелдік жұмыс күшінің еңбек қызметі жүзеге асырылатын жері бойынша уәкілетті органға тартылатын шетелдік қызметкерлер туралы мәліметтер: оның тегі, аты, әкесінің аты, туған жылы мен күні, азаматтығы, тұрақты тұратын елі, шығатын елі, білімі мен алған мамандығы, Қазақстан Республикасында қолданылатын Жұмысшылардың жұмыстары мен кәсіптерінің бірыңғай тарифтік-біліктілік анықтамалығына сәйкес кәсібінің (мамандығының) атауы көрсетілген 7-қосымшаға сәйкес өтінішті ұсынады. 24. Уәкілетті орган құжаттарды қабылдаған күннен бастап жиырма жұмыс күні ішінде қарап, Шетелдік жұмыс күшін тартуға рұқсат беру және оны ұзарту жөніндегі комиссияның (бұдан әрі - Комиссия) ұсынымдары бойынша рұқсат беру туралы (беруден бас тарту туралы) шешім қабылдайды. 25. Комиссияның құрамына орталық атқарушы органның аумақтық органдарының және Қазақстан Республикасы Ішкі істер министрлігінің өкілдері енгізіледі. 26. Комиссияның отырысына жұмыс берушінің өкілдері қатыса алады. Уәкілетті орган жұмыс беруші ұсынған құжаттар қаралатын Комиссия отырысының күні мен уақыты туралы жұмыс берушіні жазбаша хабардар етуге тиіс. 27. Уәкілетті орган жұмыс берушіні шешім қабылданған күннен бастап бес жұмыс күні ішінде қабылданған шешім туралы жазбаша хабардар етеді. Жұмыс беруші хабарлама алғаннан кейін он жұмыс күні ішінде уәкілетті органға рұқсаттың қолданылу мерзімі аяқталғаннан кейін шетелдік жұмыс күшінің тұрғылықты тұратын жеріне кетуіне кепілдік беретін құжаттарды (банк пен жұмыс берушінің арасындағы шарттың көшірмесі мен жұмыс берушінің банктегі шотына кепілді жарнасының енгізілгенін растайтын құжат) ұсынады. Рұқсат беруден бас тарту туралы шешім қабылданған жағдайда уәкілетті орган осы Ереженің 35-тармағына сәйкес оның негіздемесін көрсетеді. 28. Еңбек рыногында ұсыныстар болған жағдайда уәкілетті орган жұмыс беруші өкілінің қатысуымен бос жұмыс орнына үміткер қазақстандық азаматтардың кандидатурасын қарайды. Кездесудің орны мен уақытын уәкілетті орган белгілейді, бұл туралы жұмыс беруші мен тиісті үміткер хабардар етіледі. 29. Жұмыс беруші арнайы білімдерінің, дағдыларының жеткіліксіз болуы себепті бос жұмыс орнына орналасуға үміткер тиісті кәсіптік білімі мен жұмыс тәжірибесі бар қазақстандық азаматтардың кандидатураларынан бас тартқан жағдайда, шетелдік қызметкерді тартуға арналған рұқсат кандидатураларынан бас тартылған қазақстандық азаматтарды не жұмыс берушінің қызметкерлерінің ішінен кәсіптік даярлау, қайта даярлау, олардың біліктілігін арттыру кезеңіне беріледі. 30. Уәкілетті орган рұқсат беру (мерзімін ұзарту) туралы шешімді қабылдаған күннен бастап бес жұмыс күні ішінде: тегі, аты, әкесінің аты, туған күні мен жылы, азаматтығы, тұрақты тұратын елі, шыққан елі, білімі, кәсібінің (мамандығының) атауы мен лауазымын көрсете отырып, тартылатын шетелдік жұмыс күші туралы орталық атқарушы органға, Қазақстан Республикасы Ішкі істер министрлігі мен Қазақстан Республикасы Ұлттық қауіпсіздік комитетіне мәліметтер ұсынады. 31. "Қазақстанның 30 корпоративтік көшбасшысы" бағдарламасы шеңберінде жобаларды іске асыруға қатысатын ұйым берген рұқсатта тиісті жобаның атауы көрсетіледі. 32. Уәкілетті орган берген рұқсат тиісті әкімшілік-аумақтық бірліктің аумағында ғана қолданылады және осы Ереженің 33-тармағында көзделген жағдайларды қоспағанда, оны басқа жұмыс берушілерге беруге болмайды. 33. Жұмыс көлемі болған, сондай-ақ функционалдық міндеттерді орындау үшін шетелдік қызметкерлердің бірнеше облыстар және (немесе) Астана мен (немесе) Алматы қалалары аумағында тұрақты болуы қажет болған жағдайда, уәкілетті орган жұмыс берушінің өтініші мен орталық атқарушы органның келісімі бойынша екі және одан да көп облыстарда, сондай-ақ Астана мен (немесе) Алматы қалаларында еңбек қызметін жүзеге асыру үшін шетелдік жұмыс күшін тартуға рұқсат береді. 34. Бірінші, екінші немесе үшінші санат бойынша тартылған шетелдік қызметкерлермен еңбек шарты рұқсаттың қолданылу мерзімі аяқталғанға дейін бұзылған жағдайда жұмыс беруші осы лауазымға (кәсіпке) белгіленген біліктілік талаптарына сәйкес келген жағдайда басқа шетелдік қызметкерді рұқсаттың қолданылу мерзімінің қалған кезеңіне осы Ережеде белгіленген тәртіппен тарта алады. Бұл ретте, осы Ережеге 8, 9-қосымшалардың 1), 2) және 3) тармақшаларында көзделген құжаттарды ұсыну талап етілмейді. 35. Рұқсат мынадай: 1) осы Ережеде көзделген құжаттар толық ресімделмеген (ұсынылмаған); 2) өткен және ағымдағы күнтізбелік жылдарға берілген рұқсаттардың орындалу мерзімі келген ерекше шарттар (олар болған жағдайда) орындалмаған; 3) бөлінген квотадан асып кеткен; 4) тартылатын шетелдік қызметкер талап етілетін санат пен біліктілікке сай келмеген; 5) егер тартылатын шетелдік қызметкердің біліктілік сипаттамасын бағалау нәтижелері осы Ереженің 16-тармағында белгіленген төменгі мәннен төмен болған; 6) ішкі еңбек рыногында тиісті ұсыныстар болған; 7) жұмыс беруші өзге шетелдік қызметкерлерді рұқсатсыз тартқан жағдайларда берілмейді. Мұндай жағдайда осындай факті анықталған күннен бастап бір жұмыс жылы ішінде рұқсат берілмейді. 36. Жұмыс беруші уәкілетті органның шешімімен келіспеген кезде, қабылданған шешімге заңнамаға сәйкес шағымдана алады. 37. Рұқсаттың мерзімін ұзартуды уәкілетті орган жұмыс берушінің өтініші бойынша тиісті облыс, Астана және Алматы қалалары үшін бөлінген квота шегінде жүзеге асырады. Бірінші және екінші санаттар үшін рұқсаттың мерзімін ұзарту екі рет жүзеге асырылады. Үшінші және төртінші санаттар үшін рұқсаттың мерзімін ұзарту жүзеге асырылмайды. "Қазақстанның 30 корпоративтік көшбасшысы" бағдарламасы шеңберінде жобаларды іске асыруға қатысатын ұйымдар беретін рұқсаттың мерзімін ұзарту жобаны іске асыру мерзімі ішінде жүзеге асырылады. 38. Рұқсаттың мерзімін ұзарту үшін жұмыс беруші рұқсаттың қолданылу мерзімі аяқталғанға дейін кемінде жиырма жұмыс күні бұрын уәкілетті органға мынадай құжаттарды жібереді: 1) өтініш; 2) рұқсаттың түпнұсқасы; 3) өткен және ағымдағы күнтізбелік жылдар үшін берілген рұқсаттардың орындалу мерзімі келген ерекше шарттарының (олар болған жағдайда) орындалуы туралы ақпарат; 4) рұқсаттың мерзімін ұзарту негіздемесі. 39. Уәкілетті орган ұсынылған құжаттардың негізінде құжаттар берілген күннен бастап он жұмыс күні ішінде рұқсаттың мерзімін ұзарту немесе ұзартудан бас тарту туралы шешім қабылдайды және бас тартқан жағдайда себебін көрсете отырып жұмыс беруші мен орталық атқарушы органды қабылданған шешім туралы бес жұмыс күні ішінде жазбаша түрде хабардар етеді. 40. Рұқсаттың мерзімін ұзарту: 1) осы Ережеде көзделген құжаттар толық және тиісінше ресімделмеген; 2) өткен және ағымдағы күнтізбелік жылдар үшін берілген рұқсаттардың орындалу мерзімі келген ерекше шарттары (олар болған жағдайда) орындалмаған; 3) жұмыс беруші өкілінің қатысуымен бос лауазымға орналасудан үміткер қазақстандық азаматтардың кандидатурасын қарау нәтижелері бойынша белгіленетін тиісті ұсыныстардың еңбек рыногында болған. Қазақстандық азаматтардың тиісті кандидатураларын қарау үшін уәкілетті орган кездесу уақытын айқындайды және жұмыс беруші мен қазақстандық азаматты хабардар етеді; 4) рұқсаттың қолданылу мерзімі аяқталған жағдайларда жүзеге асырылмайды. 41. Жұмыс берушінің рұқсаттың қолданылу мерзімі аяқталғаннан кейін рұқсатты ұзарту үшін ұсынған құжаттарын уәкілетті орган қарауға қабылдамайды. 42. Уәкілетті орган жұмыс берушіні себебін көрсете отырып, жазбаша хабардар етіп, рұқсаттың қолданылуын үш айға дейінгі мерзімге тоқтата тұруға немесе рұқсатты қайтарып алуға құқылы. 43. Рұқсатты тоқтата тұру шетелдік жұмыс күшінің рұқсаттың қолдану мерзімі аяқталғанға дейін тұрғылықты тұратын жеріне кетуіне кепілдік беретін құжаттарды (банк пен жұмыс берушінің арасындағы шарттық көшірмесі мен жұмыс берушінің банктегі шотына кепілді жарнасын енгізуді растайтын құжат) уәкілетті органға осы Ереженің 27-тармағында белгіленген мерзімде ұсынбаған жағдайда жүргізіледі. 44. Тоқтатылған рұқсаттың қолданылуы уәкілетті органның шешімі бойынша анықталған бұзушылықтар жойылғаннан кейін қалпына келтіріледі, бұл туралы жұмыс берушіге қалпына келтіру туралы шешім қабылданған күннен бастап он жұмыс күні ішінде жазбаша түрде хабарланады. 45. Уәкілетті орган осы Ереженің 46-тармағында көрсетілген себептерді көрсете отырып, жұмыс берушіні кемінде бір ай бұрын жазбаша хабардар ете отырып рұқсатты кері қайтарып алады. |