Еуразиялық экономикалық комиссия туралы ереже (Еуразиялық экономикалық одақ туралы шартқа № 1 қосымша) (2024.25.04. берілген өзгерістер мен толықтырулармен)

Еуразиялық экономикалық

одақ туралы шартқа

№ 1 ҚОСЫМША

Еуразиялық экономикалық комиссия туралы

ереже
(2024.25.04. берілген өзгерістер мен толықтырулармен)

І. ЖАЛПЫ ЕРЕЖЕЛЕР

1. Еуразиялық экономикалық комиссия (бұдан әрі - Комиссия) Осы Шарттың 18-бабының 1-тармағына сәйкес Еуразиялық экономикалық одақтың тұрақты жұмыс істейтін реттеуші органы болып табылады.

Комиссияның негізгі міндеттері Еуразиялық экономикалық одақтың жұмыс істеу және даму жағдайларын қамтамасыз ету, сондай-ақ Еуразиялық экономикалық одақ шеңберіндегі экономикалық интеграция саласында ұсыныстар әзірлеу болып табылады.

2. Комиссия өз қызметін:

1) өзара пайданы, тең құқықты және мүше мемлекеттердің ұлттық мүдделерін есеп алуды қамтамасыз ету;

2) қабылданатын шешімдердің экономикалық негізділігі;

3) ашықтық, жариялылық және объективтілік қағидаттары негізінде жүзеге асырады.

2023 ж. 25 мамырдағы Хаттамамен 3-тармақ өзгертілді (2024 ж. 25 сәуірде күшіне енді) (бұр.ред.қара)

3. Комиссия өз қызметін осы Шартта және Одақ шеңберіндегі халықаралық шарттарда көзделген өкілеттіктер шегінде:

1) кедендік-тарифтік және тарифтік емес реттеу;

2) кедендік реттеу;

3) техникалық реттеу;

4) санитариялық, ветеринариялық-санитариялық және фитосанитариялық шаралар, шұғыл фитосанитариялық шаралар;

5) кедендік әкелу баждарын есепке алу және бөлу;

6) үшінші елдерге қатысты сауда режимдерін белгілеу;

7) сыртқы және өзара сауда статистикасы;

8) макроэкономикалық саясат;

9) бәсекелестік саясаты;

10) өнеркәсіптік және ауылшаруашылық субсидиялары;

11) энергетикалық саясат;

12) табиғи монополиялар;

13) мемлекеттік және (немесе) муниципалдық сатып алу;

14) көрсетілетін қызметтердің өзара саудасы және инвестициялар;

15) көлік және тасымалдау;

16) валюта саясаты;

17) зияткерлік қызмет нәтижелерін және тауарларды, жұмыстарды және көрсетілетін қызметтерді дараландыру құралдарын күзету және қорғау;

18) еңбек көші-қоны;

19) қаржы нарықтары (банк саласы, сақтандыру саласы, валюта нарығы, бағалы қағаздар нарығы);

20) осы Шартта және Одақ шеңберіндегі халықаралық шарттарда айқындалған өзге де салаларда жүзеге асырады.