Жыныстық сәйкестендіру ауытқушылықтары бар адамдар үшін медициналық куәландыру және жынысын ауыстыруды жүргізу қағидалары (Қазақстан Республикасы Денсаулық сақтау министрі 2020 жылғы 25 қарашадағы № ҚР ДСМ-203/2020 бұйрыққа 4-қосымша)

Қазақстан Республикасы

Денсаулық сақтау министрі

2020 жылғы 25 қарашадағы

№ ҚР ДСМ-203/2020 бұйрыққа

4-қосымша

Жыныстық сәйкестендіру ауытқушылықтары бар адамдар үшін

медициналық куәландыру және жынысын ауыстыруды жүргізу

қағидалары

1. Жалпы ережелер

1. Осы Жыныстық сәйкестендіру ауытқушылықтары бар адамдар үшін медициналық куәландыру және жынысын ауыстыруды жүргізу қағидалары (бұдан әрі - Қағидалар) «Халық денсаулығы және денсаулық сақтау жүйесі туралы» Қазақстан Республикасының 2020 жылғы 7 шілдедегі Кодексі (бұдан әрі - Кодекс) 156-бабының 2-тармағына сәйкес әзірленді және жыныстық сәйкестендіру ауытқушылықтары бар адамдар үшін медициналық куәландыру және жынысын медициналық түзету тәртібін айқындайды.

2. Осы Қағидаларда мынадай негізгі ұғым пайдаланылады:

1) жыныстық сәйкестендіруде ауытқушылығы бар адам - қарама-қайшы жыныстағы адам ретінде өмір сүруге және қабылдануға ұмтылатын адам;

2. Жынысын ауыстыру үшін жыныстық сәйкестендіру ауытқушылықтары бар адамдарды медициналық куәландырудан өткізу тәртібі

3. Жыныстық сәйкестендірудің бұзылулары бар, жиырма бір жасқа толған, әрекетке қабілетті, психикалық, мінез-құлықтық бұзылушылықтары (аурулары) бар (бұдан әрі - ПМБ) адамнан басқа, жынысына медициналық түзету жүргізуді қалайтын адам (бұдан әрі - куәландырылатын адам) психикалық денсаулық саласында медициналық көмек көрсететін медициналық ұйымға (бұдан әрі-медициналық ұйым) жазбаша өтініш береді.

4. Психиатр дәрігер жынысын медициналық түзетуге қарсы көрсетілімдер болып табылатын ПМБ анықтау мақсатында куәландырылатын адамның қолда бар құжаттарын қарап-тексеруді және зерделеуді жүргізеді.