«Семей ядролық қауіпсіздік аймағы туралы» Қазақстан Республикасы Заңы (Жоба) (2021 жылғы 31 наурыз) (күші жойылды)

Жоба

ҚАЗАҚСТАН РЕСПУБЛИКАСЫНЫҢ

 ЗАҢЫ

Семей ядролық қауіпсіздік аймағы туралы

Қабылданды - ҚР 2023 жылғы 5 шілдедегі № 16-VIІІ Заңын қараңыз

ҚР Үкіметінің 2021 жылғы 31 наурыздағы № 185 Қаулысымен ҚР Заңының жобасы ҚР Парламенті Мәжілісінің қарауына енгізілді

Осы Заң Семей ядролық қауіпсіздік аймағын құру және оның жұмыс істеуі кезінде туындайтын қоғамдық қатынастарды реттейді.

1-тарау. Жалпы ережелер

1-бап. Осы Заңда пайдаланылатын негізгі ұғымдар

Осы Заңда мынадай негізгі ұғымдар пайдаланылады:

1) атом энергиясын пайдалану саласындағы уәкілетті орган (бұдан әрі - уәкілетті орган) - атом энергиясын пайдалану саласында басшылықты жүзеге асыратын орталық атқарушы орган;

2) қоршаған ортаны қорғау саласындағы уәкілетті орган - қоршаған ортаны қорғау және табиғат пайдалану саласында басшылықты және салааралық үйлестіруді жүзеге асыратын орталық атқарушы орган, сондай-ақ оның аумақтық органдары;

3) негізгі қызмет түрлері - Семей ядролық қауіпсіздік аймағын құру мақсаттарына сәйкес келетін Семей ядролық қауіпсіздік аймағының операторы қызметінің түрлері;

4) радиоактивті ластанған объектілер - адамның антропогендік қызметі нәтижесінде пайда болған, ядролық сынақтардың нәтижесінде нормативтен тыс радиоактивті ластануға ұшыраған жер учаскелері мен объектілер;

5) Семей ядролық қауіпсіздік аймағы - нормативтен тыс радиоактивті ластануға ұшыраған және Қазақстан Республикасының Үкіметі айқындайтын, осы Заңда көзделген Семей ядролық қауіпсіздік аймағының арнайы құқықтық режимі қолданылатын Қазақстан Республикасы аумағының шектеулі бөлігі;