Қазақстан Республикасының Конституциялық заңы «Қазақстан Республикасындағы сайлау туралы» Қазақстан Республикасының Конституциялық заңына өзгерістер мен толықтырулар енгізу туралы Қазақстан Республикасының Конституциялық заңы (жоба) (2003 ж. 26 қараша)

жоба

Қазақстан Республикасының Конституциялық заңы "Қазақстан
Республикасындағы сайлау туралы" Қазақстан Республикасының
Конституциялық заңына өзгерістер мен толықтырулар енгізу туралы
Қазақстан Республикасының Конституциялық заңы

ҚР Үкіметінің 26.11.03 ж. № 1177 қаулысына сәйкес Заңның жобасы Қазақстан Республикасының Парламенті Мәжілісінің қарауына енгізілді

1-бап. "Қазақстан Республикасындағы сайлау туралы" Қазақстан Республикасының 1995 жылғы 28 қыркүйектегi Конституциялық заңына (Қазақстан Республикасы Жоғарғы Кеңесiнiң Жаршысы, 1995 ж., № 17-18, 114-құжат; Қазақстан Республикасы Парламентiнiң Жаршысы, 1997 ж., № 12, 192-құжат; 1998 ж., № 7-8, 71-құжат; № 22, 290-құжат; 1999 ж., № 10, 340-құжат; № 15, 593-құжат) мынадай өзгерістер мен толықтырулар енгiзiлсiн:

1) 4-баптың 4-тармағының 1) және 2) тармақшалары алынып тасталсын;

2) 5-баптың 3-тармағы мынадай редакцияда жазылсын:

"3. Кандидаттардың сайлауға қатысуына тең құқықтар мен шарттарға кепілдiк беріледі.";

3) 9-бапта:

1-тармақтың 2) тармақшасының төртiншi абзацы алынып тасталсын, 2-тармақ мынадай редакцияда жазылсын:

"2. Мәслихаттардың депутаттарын сайлау кезiнде басқа кандидаттарға қарағанда дауыс беруге қатысқан сайлаушылардың дауыс санының көпшілiгiн алған кандидат сайланған болып саналады.";

4) 10-бапта:

3-тармақ мынадай редакцияда жазылсын:

"3. Сайлау комиссияларының өкілеттiк мерзiмi бес жылды құрайды.

Сайлау комиссияларын саяси партиялармен консультациялардан кейiн тиiстi жоғары тұрған сайлау комиссиялары құрады:

Парламент Мәжілісiне депутаттар сайлау жөніндегі облыстық сайлау комиссияларын, округтiк сайлау комиссияларын, Астана, Алматы қалаларының сайлау комиссияларын Орталық сайлау комиссиясы құрады;

аудандық, қалалық сайлау комиссияларын, сондай-ақ облыстық мәслихатқа депутаттар сайлау жөніндегі округтiк сайлау комиссияларын облыстық сайлау комиссиялары құрады;

қаладағы аудандық сайлау комиссияларын, сондай-ақ қалалық мәслихатқа депутаттар сайлау жөніндегі округтiк сайлау комиссияларын Астана, Алматы қалаларының сайлау комиссиялары құрайды;