(БҰРЫНҒЫ РЕДАКЦИЯ) «МӘСЛИХАТТЫҢ ҮЛГІ РЕГЛАМЕНТІН БЕКІТУ ТУРАЛЫ» ҚАЗАҚСТ...

Қазақстан Республикасы Президентінің
 Жарлығы

Осы редакция 2021 жылғы 24 маусымда енгізілген өзгерістеріне дейін қолданылды

Мәслихаттың үлгі регламентін бекіту туралы

(2017.20.10. берілген өзгерістермен)

«Қазақстан Республикасындағы жергілікті мемлекеттік басқару және өзін өзі басқару туралы» 2001 жылғы 23 қаңтардағы Қазақстан Республикасы Заңының 9-бабына сәйкес ҚАУЛЫ ЕТЕМІН:

1. Қоса беріліп отырған Мәслихаттың үлгі регламенті бекітілсін.

2. Осы Жарлық алғашқы ресми жарияланған күнінен бастап күнтізбелік он күн өткен соң қолданысқа енгізіледі.

Астана, Ақорда, 2013 жылғы желтоқсанның 3-і.

№ 704

Қазақстан Республикасы Президентінің

2013 жылғы 3 желтоқсандағы

№ 704 Жарлығымен бекітілген

Мәслихаттың үлгі регламенті

1. Жалпы ережелер

1. Мәслихаттың осы үлгі регламенті (бұдан әрі - регламент) «Қазақстан Республикасындағы жергілікті мемлекеттік басқару және өзін өзі басқару туралы» 2001 жылғы 23 қаңтардағы Қазақстан Республикасы Заңының (бұдан әрі - Заң) 9-бабына сәйкес әзірленді және мәслихат сессияларын, оның органдарының отырыстарын өткізу, оларға мәселелер енгізу және қарау, мәслихат органдарын құру және сайлау, олардың қызметі туралы есептерді, халық алдында мәслихаттың атқарған жұмысы және оның тұрақты комиссияларының қызметі туралы есептерді тыңдау, депутаттардың сауалдарын қарау тәртібін, мәслихаттағы депутаттық бірлестіктердің өкілеттіктерін, қызметін ұйымдастыруды, сондай-ақ дауыс беру, аппарат жұмысының тәртібін және басқа да рәсімдік және ұйымдастырушылық мәселелерін белгілейді.