«Газбен жабдықтау жүйелері объектілерінің қауіпсіздігі жөніндегі талаптарды бекіту туралы» Қазақстан Республикасы Үкіметінің 2014 жылғы 5 тамыздағы № 906 Қаулысы (күші жойылды)

Газбен жабдықтау жүйелері объектілерінің қауіпсіздігі жөніндегі талаптарды бекіту туралы
Қазақстан Республикасы Үкіметінің 2014 жылғы 5 тамыздағы № 906 Қаулысы

ҚР Үкіметінің 2018 жылғы 27 наурыздағы № 139 Қаулысымен күші жойылды

«Газ және газбен жабдықтау туралы» 2012 жылғы 9 қаңтардағы Қазақстан Республикасының Заңы 5-бабының 16) тармақшасына сәйкес Қазақстан Республикасының Үкіметі ҚАУЛЫ ЕТЕДІ:

1. Қоса беріліп отырған газбен жабдықтау жүйелері объектілерінің қауіпсіздігі жөніндегі талаптар бекітілсін.

2. Осы қаулы алғашқы ресми жарияланған күнінен бастап алты ай өткен соң қолданысқа енгізіледі.

Қазақстан Республикасы

Үкіметінің

2014 жылғы 5 тамыздағы

№ 906 қаулысымен

бекітілген

Газбен жабдықтау жүйелері объектілерінің қауіпсіздігі жөніндегі 

талаптар

1. Жалпы ережелер

Қолданылу саласы және тәртібі

1. Осы Талаптарда отын ретінде пайдаланылатын артық қысымы 1,2 МПа (12 кгс/ шаршы см.) аспайтын сұйытылған табиғи газбен және артық қысымы 1,6 МПа (16 кгс/ шаршы м.) артық сұйытылған мұнай газымен (бұдан әрі - СМГ) жабдықтау жүйелерін жобалауға, салуға және пайдалануға қойылатын талаптар белгіленеді.

2. Талаптар мыналарға:

1) қалалардың, кенттердің және ауылдық елді мекендердің (кентаралық елді мекендерді қоса алғанда), өнеркәсіптік, ауыл шаруашылығы және басқа да кәсіпорындардың газ құбырларына (бұдан әрі кәсіпорын - газ жабдықтау жүйелері объектілерінің иелері болып табылатын заңды және жеке тұлғалар);

2) газ реттейтін пункттерге (бұдан әрі - ГРП) және газ реттейтін қондырғыларға (бұдан әрі - ГРҚ);

3) газ толтыру станцияларына (бұдан әрі - ГТС), газ толтыру пункттеріне (бұдан әрі - ГТП), аралық баллондар қоймаларына (бұдан әрі - АБҚ), шкафты газ реттеу пунктіне (бұдан әрі - ШРП), стационарлық автомобильді газ құю станцияларына (бұдан әрі - АГҚС), сұйытылған газдардың резервуарлық, топтық және жеке баллон қондырғыларына;