Зияткерлік меншікті құқықтық күзету мен қорғау саласындағы ынтымақтастық және Зияткерлік меншікті құқықтық күзету мен қорғау мәселелері жөнінде мемлекетаралық кеңес кұру туралы келісім (Санкт-Петербург қ., 2010 жылғы 19 қарашада) (2017.26.05. берілген өзгерістер мен толықтырулармен)

Зияткерлік меншікті құқықтық күзету мен қорғау саласындағы ынтымақтастық және
Зияткерлік меншікті құқықтық күзету мен қорғау мәселелері жөнінде мемлекетаралық кеңес кұру туралы
келісім
(Санкт-Петербург қ., 2010 жылғы 19 қарашада)

(2017.26.05. берілген өзгерістер мен толықтырулармен)

ҚР Үкіметінің 2011 жылғы 28 наурыздағы № 282 Қаулысымен бекітілді

2011 жылғы 14 тамызда күшіне енді

2017 ж. 26 мамырдағы Хаттамамен кіріспе өзгертілді (бұр.ред.қара)

Бұдан әрі Тараптар деп аталатын осы Келісімге қатысушы мемлекеттердің Үкіметтері,

ғылыми-техникалық, сауда-экономикалық және әлеуметтік-мәдени ынтымақтастықты дамытуға ниет білдіре отырып,

зияткерлік меншікті тиімді құқықтық күзету, қорғау және басқару осындай ынтымақтастықты дамытудың міндетті шарттары болып табылатынын мойындай отырып,

осы Келісімге қатысушы мемлекеттердің аумақтарында зияткерлік меншікті құқықтық күзету мен қорғау жүйесін дамыту жөнінде келісілген және үйлестірілген шараларды қабылдаудың маңыздылығын түсіне отырып,

зияткерлік меншік объектілерін коммерцияландыруды және өзге де пайдалануды қоса алғанда, зияткерлік меншікті басқару тетіктерін жетілдірудің маңыздылығын ескере отырып,

осы Келісімге қатысушы мемлекеттердің халықаралық міндеттемелерін және заңнамасын басшылыққа ала отырып,

төмендегілер туралы келісті:

2017 ж. 26 мамырдағы Хаттамамен 1-бап өзгертілді (бұр.ред.қара)

1-бап

Зияткерлік меншікті күзету мен қорғаудың мемлекетаралық жүйесін, зияткерлік меншікті басқару тетіктерін жетілдіру, зияткерлік меншік саласында құқық бұзушылыққа қарсы әрекет ету жөніндегі бірлескен қызметті үйлестіру мақсатында Тараптар:

а) қарым-қатынасты нығайту, Тараптардың мемлекеттік бюджеттерінде осы мақсаттарға көзделетін қаражат шегінде бірлескен зерттеулер жүргізу және зияткерлік меншік саласында пікір алмасу;

б) осы Келісімге қатысушы мемлекеттердің зияткерлік меншік саласындағы заңнамасы туралы ақпарат алмасу;