«Ішкі және аралас «өзен-теңіз» суларында жүзетін кемелерді сыныптау қағидасын бекіту туралы» Қазақстан Республикасы Көлік және коммуникация министрінің м.а. 2011 жылғы 21 сәуірдегі № 213 бұйрығы (2023.23.01. берілген өзгерістер мен толықтырулармен)

Ішкі және аралас «өзен-теңіз» суларында жүзетін кемелерді сыныптау қағидасын бекіту туралы
Қазақстан Республикасы Көлік және коммуникация министрінің м.а. 2011 жылғы 21 сәуірдегі № 213 бұйрығы

(2023.23.01. берілген өзгерістер мен толықтырулармен)

 «Ішкі су көлігі туралы» Қазақстан Республикасының 2004 жылғы 6 шілдедегі Заңының 9-бабының 1-тармағының 10) тармақшасына сәйкес БҰЙЫРАМЫН:

1. Қоса беріліп отырған «Ішкі және аралас «өзен-теңіз» суларында жүзетін кемелерді сыныптау қағидасы бекітілсін.

2. Қазақстан Республикасы Көлік және коммуникация министрлігінің Көлік және қатынас жолдары комитеті (Н.И. Қилыбай) белгіленген заңнамалық тәртіппен Қазақстан Республикасы Әділет министрлігіне осы бұйрықты мемлекеттік тіркеу үшін ұсынуды қамтамасыз етсін.

3. Осы бұйрықтың орындалуын бақылау Қазақстан Республикасы Көлік және коммуникация вице-министрі Е.С. Дүйсенбаевқа жүктелсін.

4. Осы бұйрық алғашқы ресми жарияланғаннан кейін 2011 жылғы 9 шілдеден бастап қолданысқа енгізіледі.

Қазақстан Республикасы

Көлік және коммуникация

министрінің міндетін

атқарушының

2011 жылғы 21 сәуірдегі

№ 213 бұйрығымен бекітілген

Ішкі және аралас «өзен-теңіз» суларында жүзетін кемелерді сыныптау

 қағидасы

ҚР Индустрия және инфрақұрылымдық даму министрінің м.а. 2020.17.03. № 143 бұйрығымен 1-тараудың тақырыбы жаңа редакцияда (бұр.ред.қара)

1-тарау. Жалпы ережелер

1. Осы Ішкі және аралас «өзен-теңіз» суларында жүзетін кемелерді сыныптау қағидасы (бұдан әрі - Қағида) «Ішкі су көлігі туралы» Қазақстан Республикасының 2004 жылғы 6 шілдедегі Заңына сәйкес әзірленген және Кеме қатынасы тіркелімімен (бұдан әрі - Кеме қатынасының тіркелімі) ішкі және аралас «өзен-теңіз» суларында жүзетін кемелерді сыныптауды (бұдан әрі - сыныптау қызметі) жүзеге асыру тәртібін анықтайды.