«Қазақстан Республикасы Бас прокуратура желісінің ақпараттық қауіпсіздігі дамуының негізгі бағыттарын бекіту туралы» Қазақстан Республикасы Бас Прокурорының 2011 жылғы 10 маусымдағы № 52 бұйрығы (2016.18.10. берілген өзгерістермен)

Қазақстан Республикасы Бас прокуратура желісінің ақпараттық қауіпсіздігі дамуының негізгі бағыттарын бекіту туралы
Қазақстан Республикасы Бас Прокурорының 2011 жылғы 10 маусымдағы № 52 бұйрығы

(2016.18.10. берілген өзгерістермен)

Прокуратура органдарында ақпараттық қауіпсіздікті одан әрі қарай жетілдіру мақсатында, «Прокуратура туралы» Қазақстан Республикасы Заңының 11-бабының 4-тармағын басшылыққа алып, БҰЙЫРАМЫН:

1. Қоса беріліп отырған Бас прокуратура желісінің ақпараттық қауіпсіздігі дамуының негізгі бағыттары бекітілсін.

ҚР Бас Прокурорының 2016.18.10. № 159 бұйрығымен 2-тармақ жаңа редакцияда (бұр.ред.қара)

2. Осы бұйрық Бас прокуратураның құрылымдық бөлімшелері, Бас прокуратура жанындағы Құқық қорғау органдары академиясы, Құқықтық статистика және арнайы есепке алу жөніндегі комитеті, Бас әскери және көлік прокуратуралары, облыс, Астана, Алматы қалалары прокуратуралары басшыларының назарына жеткізілсін.

3. Бұйрықтың орындалуын бақылау Қазақстан Республикасы Бас Прокурорының Бірінші орынбасары И.Д. Меркельге жүктелсін.

Қазақстан Республикасы

Бас Прокурорының

2011 жылғы 10 маусымдағы № 52

бұйрығына қосымша

Қазақстан Республикасы Бас прокуратурасы желісінің ақпараттық қауіпсіздігі дамуының

негізгі бағыттары

Кіріспе

Ел Президентінің 1997 жылғы 10 қазандағы «Қазақстан - 2030. Барлық қазақстандықтардың өсіп-өркендеуі, қауіпсіздігі және әл-ауқатының артуы» атты Қазақстан халқына Жолдауында ұзақ мерзімді басымдық ретінде ұлттық қауіпсіздік айқындалды, оның құрамының бірі ақпараттық қауіпсіздік болып табылады.

Қоғам мен мемлекеттің әлеуметтік-экономикалық және мәдени өміріндегі ақпараттық технологиялардың даму серпіні ақпараттық қауіпсіздік мәселелерін шешуге жоғары талаптар қояды.