«Орал қаласында коммуналдық көрсетілетін қызметтерді ұсынудың қағидаларын бекіту туралы» Батыс Қазақстан облысы Орал қаласы әкімдігінің 2022 жылғы 1 қыркүйектегі № 1583 Қаулысы

Орал қаласында коммуналдық көрсетілетін қызметтерді ұсынудың қағидаларын бекіту туралы
Батыс Қазақстан облысы Орал қаласы әкімдігінің 2022 жылғы 1 қыркүйектегі № 1583 Қаулысы

Қазақстан Республикасының «Тұрғын үй қатынастары туралы» Заңының 10-3-бабының 2-тармағының 16) тармақшасына «Қазақстан Республикасындағы жергілікті мемлекеттік басқару және өзін-өзі басқару туралы» Заңының сәйкес Орал қаласының әкімдігі ҚАУЛЫ ЕТЕДІ:

1. Қоса беріліп отырған Орал қаласының коммуналдық көрсетілетін қызметтерді ұсынудың қағидалары бекітілсін.

2. Бірыңғай мемлекеттік-құқықтық жұмыстар қызметі бөлімінің басшысы осы қаулыны Қазақстан Республикасы Әділет министрлігінде мемлекеттік тіркеуді жүргізсін.

3. Осы қаулының орындалуын бақылау жетекшілік ететін Орал қаласы әкімінің орынбасарына жүктелсін.

4. Осы қаулы алғашқы ресми жарияланған күнінен кейін күнтізбелік он күн өткен соң қолданысқа енгізіледі.

Орал қаласы әкімдігінің

2022 жылғы 1 қыркүйектегі

№ 1583 қаулысымен

бекітілген

Орал қаласында коммуналдық көрсетілетін қызметтерді ұсыну

қағидалары

1-тарау. Жалпы ережелер

1. Осы коммуналдық көрсетілетін қызметтерді ұсынудың қағидалары (бұдан әрі – Қағидалар) «Тұрғын үй қатынастары туралы» 1997 жылғы 16 сәуiрдегi Қазақстан Республикасы Заңының 10-3 бабының 2 тармағының 16) тармақшасына сәйкес әзірленді және коммуналдық көрсетілетін қызметтерді ұсыну мен ақы төлеу тәртібін белгілейді.

2. Осы Қағидаларда мынадай негізгі ұғымдар пайдаланылады:

1) жылумен жабдықтау – жылу энергиясын және (немесе) жылу жеткізгішті өндіру, беру, бөлу және тұтынушыларға сату жөніндегі қызмет;

2) электрмен жабдықтау – электр энергиясын өндіру, беру және тұтынушыларға сату жөніндегі қызмет;

3) сумен жабдықтау – суды жинауды, сақтауды, дайындауды, беруді және сумен жабдықтау жүйесі арқылы су тұтынушыларға таратуды қамтамасыз ететін іс-шаралар жиынтығы;