(БҰРЫНҒЫ РЕДАКЦИЯ) «АСА ЖЕҢІЛ АВИАЦИЯ ӘУЕ КЕМЕСІНІҢ ҰШУҒА ЖАРАМДЫЛЫҒЫ С...

Осы редакция 2019 жылғы 9 қазанда енгізілген өзгерістеріне дейін қолданылды

Қазақстан Республикасы

Инвестициялар және даму

министрінің

2015 жылғы 28 сәуірдегі

№ бұйрығына 7-қосымша

«Аса жеңіл авиация әуе кемесінің ұшуға жарамдылығы сертификатын беру»

мемлекеттік көрсетілетін қызмет стандарты

«Аса жеңіл авиация әуе кемесінің ұшуға жарамдылығы сертификатын беру» мемлекеттік қызметінің регламентін қараңыз

1. Жалпы ережелер

1. «Аса жеңіл авиация әуе кемесінің ұшуға жарамдылығы сертификатын беру» мемлекеттік көрсетілетін қызметі (бұдан әрі - мемлекеттік көрсетілетін қызмет).

2. Мемлекеттік көрсетілетін қызмет стандартын Қазақстан Республикасы Инвестициялар және даму министрлігі (бұдан әрі - Министрлік) әзірледі.

3. Мемлекеттік көрсетілетін қызметті Министрліктің Азаматтық авиация комитеті (бұдан әрі - көрсетілетін қызметті беруші) көрсетеді.

Мемлекеттік қызметті көрсетуге өтініштерді қабылдау және мемлекеттік қызмет көрсету нәтижелерін беру:

1) көрсетілетін қызметті берушінің кеңсесі арқылы

2) www.e.gov.kz  «электрондық үкімет» веб-порталы (бұдан әрі - портал) арқылы жүзеге асырылады.

2. Мемлекеттік қызметті көрсету тәртібі

4. Мемлекеттік қызметті көрсету мерзімдері:

1) құжаттар топтамасын көрсетілетін қызметті берушіге тапсырған сәттен бастап, сондай-ақ порталға жүгінген кезде:

аса жеңіл авиация әуе кемесінің ұшуға жарамдылығы сертификатын беру - күнтізбелік 30 (отыз) күн;

аса жеңіл авиация әуе кемесінің ұшуға жарамдылығы сертификатын (телнұсқасын) беру - күнтізбелік 2 (екі) күн;

2) көрсетілетін қызметті алушыға құжаттар топтамасын тапсыру үшін күтудің рұқсат етілген ең ұзақ уақыты - 20 (жиырма) минут;

3) көрсетілетін қызметті алушыға қызмет көрсетудің рұқсат етілген ең ұзақ уақыты - 30 (отыз) минут.

5. Мемлекеттік қызметті көрсету нысаны: электрондық (ішінара автоматтандырылған) және қағаз түрінде.

6. Мемлекеттік қызметті көрсету нәтижесі - аса жеңіл авиация әуе кемесінің ұшуға жарамдылығы сертификаты (сертификат телнұсқасы).