Көші-қонға бақылау жасауды күшейту жөніндегі кейбір шаралар туралы Қазақстан Республикасы Үкіметінің 2003 жылғы 13 наурыздағы № 241 қаулысы (2006.13.01. берілген өзгерістер мен толықтырулармен) (күші жойылды)

Көшi-қонға бақылау жасауды күшейту жөніндегі кейбір шаралар туралы
Қазақстан Республикасы Үкіметінің 2003 жылғы 13 наурыздағы № 241 Қаулысы

(2006.13.01. берілген өзгерістер мен толықтырулармен)

ҚР Үкіметінің 2012 жылғы 21 қаңтардағы № 148 Қаулысымен күші жойылды

«Халықтың көшi-қон туралы» Қазақстан Республикасының 1997 жылғы 13 желтоқсандағы Заңының 21-бабына сәйкес, шетелдiк азаматтардың Қазақстан Республикасына келуiн және онда болуын бақылауды ретке келтiру мақсатында Қазақстан Республикасының Үкіметі қаулы етеді:

1. «Шетел азаматтарының Қазақстан Республикасында болуын құқықтық реттеудiң жекелеген мәселелерi» туралы Қазақстан Республикасы Үкіметінiң 2000 жылғы 28 қаңтардағы № 136 қаулысына (Қазақстан Республикасының ПҮКЖ-ы, 2000 ж., № 4, 55-құжат, № 27, 320-құжат) мынадай толықтырулар мен өзгерістер енгiзiлсiн:

көрсетiлген қаулымен бекітілген Шетелдiк азаматтардың Қазақстан Республикасына келуiнiң және болуының, сондай-ақ олардың Қазақстан Республикасынан кетуiнiң тәртібінде:

мынадай мазмұндағы 11-1-тармақпен толықтырылсын:

«11-1. Қазақстан Республикасына келу кезiнде 16 жасқа толған әрбiр шетелдiк азаматқа көшi-қон карточкасы беріледi.

Көшi-қон карточкалары Қазақстан Республикасынан кету кезiнде тапсырылуы тиiс.

Көшi-қон карточкалары:

паспорттары Қазақстан Республикасының Сыртқы iстер министрлігінде және оның өкiлдiктерiнде тiркелетiн адамдарға;

Қазақстан Республикасының визасы бар адамдарға;

әуе, теңiз және өзен кемелерi экипаждарының мүшелерiне;

поезд, оның iшiнде рефрижератор, локомотив бригадаларының жұмыскерлерiне және темір жол көлiгiмен тасымалданатын жүктердi бiрге алып жүретiн адамдарға;

Қазақстан Республикасының аумағы арқылы транзитпен өтетiн поездардың жолаушыларына;

халықаралық автотасымалдауды жүзеге асыратын автокөлiк құралдарының жүргiзушiлерiне берiлмейдi.

Көшi-қон карточкасын беру ережесін Қазақстан Республикасының Үкіметі уәкiлеттiк берген органдар айқындайды.»;

13-тармақ мынадай редакцияда жазылсын:

«13. Қазақстан Республикасында уақытша болатын шетелдiк азаматтар бес күнтiзбелiк күн iшiнде өзiнiң тұрақты немесе уақытша тұратын жерi бойынша тiркелуге мiндеттi. Шетелдiк азаматтарды тiркеу жеке басын куәландыратын құжаттар бойынша жүзеге асырылады.»;

15-тармақ мынадай редакцияда жазылсын:

«15. Тiркеу шетелдiк азаматтың ұлттық паспорты мен визасының қолданылу мерзiмiнен аспайтын кезеңге ресiмделедi.

Қазақстан Республикасымен келудiң және болудың визасыз тәртібі туралы халықаралық шарттары бар елдерден Қазақстан Республикасына келген азаматтарды тiркеу тоқсан тәулiктен аспайтын мерзiмге жүргiзiледi және кейiннен дәл осындай мерзiмге ұзартылуы мүмкiн.

Шетелдiк жұмыс күшiн тартуға заңда белгiленген тәртiппен ресiмделген рұқсаты бар шетелдiк азаматтарды тiркеу осы рұқсаттың қолданылу мерзiмiне ресiмделедi.

Қазақстан Республикасының оқу орындарында оқитын шетелдiк азаматтарды тiркеу бiр оқу жылына ресiмделедi.

Шетелдiк азаматтар Қазақстан Республикасының заңнамалық кесiмдерiне және Қазақстан Республикасы бекiткен халықаралық шарттарға сәйкес паспорттарды тiркеуден босатылуы мүмкін.»;

23-тармақ мынадай редакцияда жазылсын:

«23. Шетелдiк азаматқа және азаматтығы жоқ адамға Қазақстан Республикасында тұрақты тұруға рұқсат беруден мыналарға бас тартылуы мүмкiн:

1) алдын ала заңсыз көшiп келушiлерге, сондай-ақ өздерi шыққан елдердiң заңнамасы бойынша қылмыс жасағаны үшiн қудаланушы көшiп-келушілерге;

2) тұрақты тұратын жерi қылмыс жасағанға дейiн Қазақстан Республикасынан тысқары жерде болған, бас бостандығынан айыру орындарынан босатылған адамдарға;

3) адамзатқа қарсы қылмыстар жасаған адамдарға;

4) оралмандардан басқа, Қазақстан Республикасының Үкіметі белгiлеген тәртiппен Қазақстан Республикасында болу кезеңiнде өзiнiң төлем қабiлеттiгiн растау қағазын ұсынбаған адамдарға;

5) Қазақстан Республикасының денсаулық сақтау органдары мен басқа да уәкілеттi органдарының қорытындысына сәйкес Қазақстан Республикасының аумағында эпидемияның туындауына себеп болуы мүмкiн ауруы бар адамдарға;

6) Қазақстан Республикасының Үкіметі белгiлеген тәртiппен уәкiлeттi органның, iшкi iстер органдарының және Ұлттық қауiпсiздiк комитетiнiң дәлелдi шешiмiнiң негiзiнде Шетелдiк азаматтардың және азаматтығы жоқ адамдардың Қазақстан Республикасында болуының құқықтық ережесi туралы заңнаманы бұзған адамдарға.

Тұрақты тұру рұқсатын және азаматтығы жоқ адамның куәлiгiн беруден бас тарту Қазақстан Республикасының заңнамасында белгiленген тәртiппен шағымдалуы мүмкiн.»;

36-тармақтың бiрiншi абзацы мынадай мазмұндағы сөйлеммен толықтырылсын:

«Оларды ұстау Қазақстан Республикасының азаматтары үшiн белгiленген тәртiппен iшкi iстер органының арнайы мекемелерiнде жүргізіледі.».

2. Қазақстан Республикасының Iшкi iстер министрлігі, Ұлттық қауiпсiздiк комитетi (келісім бойынша), Кедендiк бақылау агенттiгi, Көлiк және коммуникациялар министрлігі заңнамада белгiленген тәртiппен 2003 жылғы 1 мамырға дейiнгi мерзiмде көшi-қон карточкаларын берудiң бiрыңғай ережесін әзiрлесiн, оларды ресiмдеу жөніндегі функцияларды мемлекеттік шекара арқылы өткізу пункттерiнде ҰҚК Шекара қызметiнiң әскери қызметшiлерiне, ал олар болмаған жерлерде - Қазақстан Республикасы Кедендiк бақылау агенттiгiнiң қызметкерлерiне жүктесін.

Қазақстан Республикасының Көлiк және коммуникациялар министрлігі шетел азаматтарына жолаушы көлiгiнiң жол жүру кезiнде Қазақстан Республикасының мемлекеттік шекарасы арқылы өткізу пункттерiне келгенге дейiн тасымалдаушылардың көшi-қон карточкаларының бланктерiн алдын ала беруiн қамтамасыз етсiн.

3. Қазақстан Республикасының Көлiк және коммуникациялар министрлігі Сыртқы iстер министрлігімен бiрлесiп, белгiленген тәртiппен Ресей Федерациясының Жол қатынастары министрлігімен Қазақстан Республикасының бақылау органдарын Ресей темір жол басқармасының қарамағындағы темір жол учаскелеріндегі темір жол өткізу пункттерiнде орналастыруды келiссiн және жолаушы және жүк тасушы поездардың шекаралық және кедендiк бақылау жүргiзу үшiн қажеттi уақытқа тоқтап тұруын белгілесiн.

ҚР Үкіметінің 2006.13.01. № 38 қаулысымен 4-тармақ өзгертілді (бұр.ред.қара)

4. Қазақстан Республикасының Көлiк және коммуникациялар министрлігі, Iшкi iстер министрлігі, Ұлттық қауiпсiздiк комитетi (келісім бойынша), Қаржы министрлігі көшi-қон бақылауын жүзеге асыру кезiнде ведомстволық жүйелердiң, оның iшiнде «ТАИС» және «Бүркiт» жүйелерiнiң пайдаланылуын қамтамасыз етсiн.

5. Осы қаулы жарияланған сәттен бастап күшiне енедi.

Қазақстан Республикасының