Медициналық рентгенологиялық жабдықтарды пайдалануды қоспағанда, рентгендік жабдықты әзірлеу, өндіру, өткізу және пайдалану жөніндегі қызметті лицензиялау ережесі (Қазақстан Республикасы Үкіметінің 2008 жылғы 19 наурыздағы № 270 қаулысымен бекітілген) (күші жойылды)

Қазақстан Республикасы

Үкіметінің

2008 жылғы 19 наурыздағы

№ 270 қаулысымен

бекітілген

ҚР Үкіметінің 2012.14.05. № 610 Қаулысымен күші жойылды (алғашқы ресми жарияланғанынан кейін күнтізбелік жиырма бір күн өткен соң қолданысқа енгізілді)

Медициналық рентгенологиялық жабдықтарды пайдалануды қоспағанда, рентгендік жабдықты әзірлеу, өндіру, өткізу және пайдалану жөніндегі қызметті лицензиялау
 ережесі
 
 
1. Жалпы ережелер

1. Осы Медициналық рентгенологиялық жабдықтарды пайдалануды қоспағанда, рентгендік жабдықты әзірлеу, өндіру, өткізу және пайдалану жөніндегі қызметті лицензиялау ережесі Қазақстан Республикасының «Атом энергиясын пайдалану туралы» 1997 жылғы 14 сәуірдегі, «Лицензиялау туралы» 2007 жылғы 11 қаңтардағы заңдарына сәйкес әзірленді және медициналық рентгенологиялық жабдықтарды пайдалануды қоспағанда, рентгендік жабдықты әзірлеу, өндіру, өткізу және пайдалану жөніндегі қызметті лицензиялау тәртібін анықтайды.

2. Лицензиялау субъектілері заңды және жеке тұлғалар болып табылады.

3. Қызметті лицензиялауды Қазақстан Республикасы Энергетика және минералдық ресурстар министрлігінің Атом энергетикасы комитеті (бұдан әрі - лицензиар) жүзеге асырады.

4. Медициналық рентгенологиялық жабдықтарды пайдалануды қоспағанда, рентгендік жабдықты әзірлеу, өндіру, өткізу және пайдалану жөніндегі қызметпен айналысу құқығына берілетін лицензия қолданылу мерзімі шектеусіз бас лицензия болып табылады.

2. Лицензия беру тәртібі

5. Лицензия алу үшін өтініш беруші (заңды немесе жеке тұлға) лицензиарға мына құжаттарды ұсынады:

1) белгіленген үлгідегі өтініш;

2) Жарғының және өтініш берушінің заңды тұлға ретінде мемлекеттік тіркелуі туралы куәлігінің нотариалды куәландырылған көшірмелері (заңды тұлға үшін);

3) жеке басын куәландыратын құжаттың көшірмесі (жеке тұлға үшін);

4) өтініш берушінің жеке кәсіпкер ретінде мемлекеттік тіркелуі туралы куәлігінің нотариалды куәландырылған көшірмесі (жеке кәсіпкер үшін);

5) өтініш берушінің салық органында есепте тұрғаны туралы куәлігінің нотариалды куәландырылған көшірмесі;

6) жекелеген қызмет түрлерімен айналысу құқығы үшін бюджетке лицензиялық алым төлегенін растайтын құжат;

7) біліктілік талаптарына сәйкес мәліметтер мен құжаттар.

6. Лицензия алу үшін лицензиарға өтінішпен бірге берілген барлық құжаттар тізімдеме бойынша қабылданады, өтініш берушіге лицензиардың құжаттарды қабылдап алған күні туралы белгі қойылып, оның көшірмесі жіберіледі (тапсырылады).

7. Лицензияны лицензиар осы Ережеде белгіленген тиісті құжаттармен бірге өтініш берілген күннен бастап отыз жұмыс күнінен кешіктірмей, ал шағын кәсіпкерлік субъектілері үшін он жұмыс күнінен кешіктірмей береді.

8. Егер:

1) Қазақстан Республикасының заңдарында субъектілердің осы санаты үшін қызметтің жекелеген түрімен айналысуға тыйым салынған болса;

2) осы Ереженің 5-тармағына сәйкес талап етілетін барлық құжаттар табыс етілмеген болса;

3) осы қызметпен айналысу құқығы үшін лицензиялық алым енгізілмеген болса;

4) өтініш беруші біліктілік талаптарына сай келмейтін болса;

5) өтініш берушіге қатысты оған осы қызметпен айналысуға тыйым салатын заңды күшіне енген сот үкімі болған жағдайларда лицензия беруден бас тартылуы мүмкін.

9. Лицензия беруден бас тартқан жағдайда лицензиар лицензия беру үшін белгіленген мерзімдерде өтініш берушіге жазбаша түрде дәлелді жауап қайтарады.

10. Егер лицензиар белгіленген мерзімде өтініш берушіге лицензияны бермеген немесе өтініш берушіні лицензияны беруден бас тарту себептері туралы жазбаша хабардар етпесе, лицензияны беру үшін белгіленген мерзімдер біткен күннен бастап бес жұмыс күні өткен соң өтініш беруші лицензиарды қызметтің өзі мәлімдеген түрін жүзеге асыра бастағаны туралы жазбаша түрде хабардар етеді.

Лицензиар өтініш берушінің жазбаша хабарламасын алған уақытынан бастап бес жұмыс күнінен кешіктірмей, өтініш беруші жазбаша хабарламада көрсеткен күннен бастап лицензияны береді.

11. Лицензиар берілген, қайта ресімделген, тоқтатылған, жаңартылған және қолданылуы тоқтатылған лицензиялардың тізілімін жүргізуді жүзеге асырады.

12. Лицензиядан айыру, қолданылуын тоқтату Қазақстан Республикасының әкімшілік құқық бұзушылық туралы заңнамасында көзделген тәртіппен жүзеге асырылады.

13. Лицензияны жоғалтып алған немесе бүлдіріп алған жағдайда лицензияның телнұсқаларын беру лицензиялау туралы заңнамаға сәйкес жүзеге асырылады.

14. Лицензиялау туралы заңда көзделген жағдайларда лицензияның қолданылуы тоқтатылған кезде лицензиат он жұмыс күні ішінде лицензияны лицензиарға қайтаруға міндетті.

15. Лицензиардың шешімдері мен іс-қимылдарына Қазақстан Республикасының заңнамасында белгіленген тәртіппен шағымдануға болады.

16. Лицензиар Қазақстан Республикасының лицензиялау туралы заңнамасын лицензиаттың сақтауын қамтамасыз етуге бағытталған лицензиялық бақылауды жүзеге асырады.

Қазақстан Республикасы

Үкіметінің

2008 жылғы 19 наурыздағы

№ 270 қаулысымен

бекітілген

Медициналық рентгенологиялық жабдықтарды пайдалануды

қоспағанда, рентгендік жабдықты әзірлеу, өндіру, өткізу және

пайдалану жөніндегі қызметке қойылатын біліктілік талаптары

1. Осы Медициналық рентгенологиялық жабдықтарды пайдалануды қоспағанда, рентгендік жабдықты әзірлеу, өндіру, өткізу және пайдалану жөніндегі қызметке қойылатын біліктілік талаптары Қазақстан Республикасының «Атом энергиясын пайдалану туралы» 1997 жылғы 14 сәуірдегі, «Лицензиялау туралы» 2007 жылғы 11 қаңтардағы заңдарына сәйкес әзірленді.

2. Медициналық рентгенологиялық жабдықтарды пайдалануды қоспағанда, рентгендік жабдықты әзірлеу, өндіру, өткізу және пайдалану бойынша лицензия алу үшін біліктілік талаптары өтініш берушіде:

1) иондаушы сәуле шығару көздерін дайындауға арналған меншік немесе жалға беру құқығындағы өндірістік-техникалық базаның (мамандандырылған өндірістік үй-жайлардың, инженерлік құрылыстардың, технологиялық желілер мен бақылау аспаптарының);

2) дайындалатын рентген жабдығына Қазақстан Республикасының техникалық реттеу туралы заңнамасына сәйкес бекітілген стандарттардың;

3) мамандығы бойынша тиісті білімі және бір жылдан кем емес практикалық жұмыс тәжірибесі бар, техникалық пайдалану ережелерін және радиациялық қауіпсіздік ережелерін білу бойынша біліктілігін тексеруден өткен және радиациялық қауіпті жұмыстарға рұқсат етілген техникалық басшылардың, мамандардың білікті құрамының;

4) персоналдың сәулелену мөлшерін өлшеу және есептеу жүйесінің;

5) өндірістік радиациялық бақылауды қамтамасыз ететін жауаптының;

6) радиациялық қауіпсіздік бойынша, персоналдың авариялық жағдайлардағы іс-қимылы бойынша бекітілген нұсқаулықтарының;

7) иондаушы сәуле шығару көздерімен жұмыс жүргізудің белгіленген тәртіппен бекітілген технологиялық регламентінің (нұсқаулықтың);

8) мәлімделетін қызмет түрін жүзеге асыру кезінде белгіленген тәртіппен бекітілген қауіпсіздік сапасын қамтамасыз ету бағдарламасының;

9) мәлімделетін қызмет түрі бойынша өтініш беруші бекіткен нормативтік құқықтық актілер, нормативтік, техникалық және әдістемелік құжаттамалар тізбесінің;

10) иондаушы сәуле шығару көздеріне арналған санитарлық паспортының;

11) қызметкер еңбек (қызметтік) міндеттерін атқарған кезде оның өмірі мен денсаулығына зиян келтіргені үшін жұмыс берушінің азаматтық-құқықтық жауапкершілігін міндетті сақтандыру туралы шартының болуын қамтиды.