«Қазақстан Республикасының Үкіметі жанындағы Машина жасау саласын дамыту жөнінде комиссия құру туралы» Қазақстан Республикасы Үкіметінің 2008 жылғы 18 маусымдағы № 596 Қаулысы (2009.20.07. берілген өзгерістер мен толықтыруларымен) (күші жойылды)

Қазақстан Республикасының Үкіметі жанындағы Машина жасау саласын дамыту жөнінде комиссия құру туралы
Қазақстан Республикасы Үкіметінің 2008 жылғы 18 маусымдағы № 596 Қаулысы

(2009.20.07. берілген өзгерістер мен толықтыруларымен)

ҚР Үкіметінің 2010 жылғы 20 мамырдағы № 453 Қаулысымен күші жойылды

Машина жасау саласын дамыту мақсатында Қазақстан Республикасының Үкіметі ҚАУЛЫ ЕТЕДІ:

1. Қазақстан Республикасының Үкіметі жанындағы Машина жасау саласын дамыту жөніндегі комиссия (бұдан әрі - Комиссия) осы қаулыға қосымшаға сәйкес құрамда құрылсын.

2. Қоса беріліп отырған Комиссия туралы ереже бекітілсін.

3. Осы қаулы қол қойылған күнінен бастап қолданысқа енгізіледі.

ҚР Үкіметінің 2009.20.07. № 1101 қаулысымен қосымша өзгертілді (бұр.ред.қара)

Қазақстан Республикасы

Үкіметінің

2008 жылғы 18 маусымдағы

№ 596 қаулысына

қосымша

Қазақстан Республикасының Үкіметі жанындағы Машина

жасау саласын дамыту жөніндегі комиссияның құрамы

Қазақстан Республикасы

Үкіметінің

2008 жылғы 18 маусымдағы

№ 596 қаулысымен

бекітілген

Қазақстан Республикасының Үкіметі жанындағы Машина

жасау саласын дамыту жөнінде комиссия туралы

ереже

1. Жалпы ережелер

1. Қазақстан Республикасының Үкіметі жанындағы Машина жасау саласын дамыту жөніндегі комиссия (бұдан әрі - Комиссия) Қазақстан Республикасының Үкіметі жанындағы консультативтік-кеңесші орган болып табылады.

2. Комиссия өз қызметінде Қазақстан Республикасының Конституциясы мен заңдарын, Қазақстан Республикасының Президенті мен Үкіметінің актілерін және өзге де нормативтік құқықтық актілерді, Қазақстан Республикасының халықаралық шарттарын, сондай-ақ осы Ережені басшылыққа алады.

2. Комиссияның негізгі міндеттері

3. Комиссияның негізгі міндеттері:

1) қажеттіліктер мен ішкі және сыртқы нарықтарда өнімге сұраныстың даму перспективаларын ескере отырып, машина жасау саласын дамытудың перспективалы бағыттарын белгілеу;

2) машина жасау кәсіпорындарының ішкі және сыртқы өндірістік кооперациясын ынталандыру және дамыту;

3) машина жасау саласы үшін жоғары, бастапқы және орта техникалық және кәсіби білімі бар білікті кадрлар даярлау және оларды салаға тарту;

4) машина жасау саласындағы ғылыми-техникалық әзірлемелерді коммерцияландыруда инновациялық, ақпараттық қызметтерді көрсетуді қамтамасыз ететін машина жасау саласындағы қазіргі заманғы инновациялық инфрақұрылымды қалыптастыру және дамыту жөніндегі ұсыныстарды әзірлеу болып табылады.

3. Комиссияның құқықтары

4. Комиссия өз құзыреті шегінде өзіне жүктелген міндеттерді жүзеге асыру үшін:

1) орталық атқарушы және басқа да мемлекеттік органдармен және ұйымдармен өзара іс-қимыл жасауға;

2) Комиссияның құзыретіне кіретін мәселелер бойынша мемлекеттік органдар мен ұйымдардың өкілдерін, сондай-ақ жеке тұлғаларды Комиссияның отырысына шақыруға және тыңдауға;

3) заңнамада белгіленген тәртіппен мемлекеттік және басқа да ұйымдардан, сондай-ақ жеке тұлғалардан Комиссияның міндеттерін іске асыру үшін қажетті материалдарды сұратуға және алуға;

4) машина жасау саласының мәселелерін реттейтін Қазақстан Республикасының заңнамасын және нормативтік-құқықтық актілерді жетілдіру жөніндегі ұсыныстарды Қазақстан Республикасының Үкіметіне белгіленген тәртіппен енгізуге құқылы.

4. Комиссия қызметін ұйымдастыру

5. Комиссияны төраға - Қазақстан Республикасы Премьер-Министрінің орынбасары басқарады. Комиссия төрағасы оның қызметіне басшылық жасайды, отырыстарына төрағалық етеді, жұмысын жоспарлайды, шешімдердің іске асырылуын жалпы бақылауды жүзеге асырады және Комиссияның жүзеге асыратын қызметі үшін және Комиссия дайындайтын шешімдер үшін дербес жауап береді. Төраға болмаған кезде, оның функцияларын төрағаның орынбасары орындайды.

6. Қазақстан Республикасы Индустрия және сауда министрлігі Комиссияның жұмыс органы болып табылады.

7. Комиссия отырыстарының күн тәртібі жөніндегі ұсыныстарды, қажетті құжаттарды, материалдарды дайындауды және отырыстардың хаттамаларын ресімдеуді Комиссияның хатшысы жүзеге асырады.

Хатшы комиссия мүшесі болып табылмайды.

8. Комиссияның хатшысы отырысқа дейін үш күннен кешіктірмей Комиссия мүшелеріне барлық қажетті құжаттарды жібереді.

9. Комиссияның отырысы қажеттілігіне қарай өткізіледі. Комиссияның отырысы Комиссия мүшелерінің жалпы санының кемінде үштен екісі қатысқан кезде заңды деп есептеледі.

10. Комиссияның шешімі ашық дауыс беру арқылы қабылданады және егер оған Комиссия мүшелерінің жалпы санының көпшілік даусы берілсе, қабылданды деп есептеледі. Дауыстар тең болған жағдайда, төраға дауыс берген шешім қабылданды деп есептеледі.

Комиссия мүшелерінің ерекше пікір білдіруге құқығы бар, ол білдірілген жағдайда, жазбаша түрде баяндалуы және Комиссия хаттамасына қоса берілуі тиіс.

11. Комиссия отырыстарының өткізілу нәтижелері бойынша оның барлық мүшелері қол қоятын хаттама жасалады.

Жұмыс органы Комиссия отырысының хаттамасын Қазақстан Республикасының Үкіметіне жібереді.

12. Комиссия өзінің қызметін Қазақстан Республикасы Үкіметінің шешімі негізінде тоқтатады.