(БҰРЫНҒЫ РЕДАКЦИЯ) ҚР БАС ПРОКУРОРЫНЫҢ 2012.07.03 № 22 БҰЙРЫҒЫ

Прокуратура органдарында алдын ала тергеуді ұйымдастыру туралы нұсқаулықты бекіту туралы
Қазақстан Республикасы Бас Прокурорының 2012 жылғы 7 наурыздағы № 22 бұйрығы

Осы редакция 2013 жылғы 18 шілдеде енгізілген өзгерістеріне дейін қолданылды

Прокуратура органдарында тергеу функциясын одан әрі жетілдіру мақсатында «Прокуратура туралы» Қазақстан Республикасы Заңының 11-бабының 4-тармағын басшылыққа ала отырып, БҰЙЫРАМЫН:

1. Қоса беріліп отырған Прокуратура органдарында алдын ала тергеуді ұйымдастыру туралы нұсқаулық бекітілсін.

2. Бас Прокурордың 2011 жылғы 15 сәуірдегі № 36 бұйрығының күші жойылды деп танылсын.

3. Бұйрықтың орындалуын бақылау Қазақстан Республикасы Бас Прокурорының жетекшілік ететін орынбасары 3-сыныпты мемлекеттік әділет кеңесшісі Н.М. Исаевқа жүктелсін.

4. Осы бұйрық Бас прокуратураның құрылымдық бөлімшелерінің, Құқықтық статистика және арнайы есепке алу комитетінің, бас әскери және көлік прокуратураларының, облыстық және оларға теңестірілген прокуратуралардың, Бас прокуратура жанындағы С. Есқараев атындағы Институт басшыларының назарына жеткізілсін.

Қазақстан Республикасы

Бас Прокурорының

2012 жылғы 7 наурыздағы

№ 22 бұйрығымен

бекітілген

Прокуратура органдарында алдын ала тергеуді ұйымдастыру туралы

нұсқаулық

1. Жалпы ережелер

1. Осы Нұсқаулық Қазақстан Республикасы Қылмыстық іс жүргізу кодексінің (бұдан әрі - ҚІЖК) 191-бабының 3-бөлігіндегі, 197-бабы 1-бөлігінің 12-тармағындағы және 198-бабы 3-бөлігіндегі тәртіппен прокуратура органдарында қылмыстық істер бойынша алдын ала тергеудің ұйымдастырылуын реттейді.

2. Прокуратура органдарында алдын ала тергеу нысанында қылмыстық ізге түсу функциясын Қазақстан Республикасы Бас прокуратурасының Арнайы прокурорлар департаменті (бұдан әрі - Департамент) және облыстардағы және оларға теңестірілген арнайы прокурорлар басқармасы (топтары) (бұдан әрі - басқарма және топтар) жүзеге асырады.