(БҰРЫНҒЫ РЕДАКЦИЯ) «БЮДЖЕТТІҢ АТҚАРЫЛУЫ ЖӘНЕ ОҒАН КАССАЛЫҚ ҚЫЗМЕТ КӨРСЕ...

Бюджеттің атқарылуы және оған кассалық қызмет көрсету ережесін бекіту туралы

Қазақстан Республикасы Қаржы министрінің 2014 жылғы 4 желтоқсандағы № 540 бұйрығы

(2021.26.05. берілген өзгерістер мен толықтырулармен)

Осы редакция 2021 жылғы 10 маусымда енгізілген өзгерістеріне дейін қолданылды

ҚР Премьер-Министрінің Бірінші орынбасары - ҚР Қаржы министрінің 2019.03.06. № 533 бұйрығымен кіріспе жаңа редакцияда (бұр.ред.қара)

2008 жылғы 4 желтоқсандағы Қазақстан Республикасының Бюджет кодексi 82-бабының 8-тармағына сәйкес БҰЙЫРАМЫН:

1. Қоса беріліп отырған Бюджеттің атқарылуы және оған кассалық қызмет көрсету ережесі бекітілсін (бұдан әрі - Ереже).

2. Қазақстан Республикасы Қаржы министрлігінің Бюджеттік рәсімдер әдіснамасы департаментіне (З.А. Ерназарова):

1) осы бұйрықты Қазақстан Республикасы Әділет министрлігінде мемлекеттік тіркеуді;

2) осы бұйрықты Қазақстан Республикасы Қаржы министрлігінің интернет-ресурсында орналастыруды қамтамасыз етсін.

3. Осы бұйрық Қазақстан Республикасы Әділет министрлігінде мемлекеттік тіркелген күнен бастап, 2015 жылғы 1 қаңтардан бастап қолданысқа енгізілетін Ереженің 4-тарауының 4-параграфын қоспағанда, қолданысқа енгізіледі.

Қазақстан Республикасы

Қаржы министрінің

2014 жылғы 4 желтоқсандағы

№ 540 бұйрығымен бекітілген

Бюджеттің атқарылуы және оған кассалық қызмет көрсету

 ережесі

ҚР Премьер-Министрінің Бірінші орынбасары - ҚР Қаржы министрінің 2020.26.03. № 320 бұйрығымен 1-тараудың тақырыбы жаңа редакцияда (бұр.ред.қара)

1-тарау. Жалпы ережелер

1. Осы Бюджеттің атқарылуы және оған кассалық қызмет көрсету ережесі (бұдан әрі - Ереже) республикалық және жергілікті бюджеттердің атқарылу және оған кассалық қызмет көрсету тәртібін, мемлекеттік мекемелердің және уәкілетті мемлекеттік органдардың бюджетке түсімдердің түсуін қамтамасыз ету, бюджеттік бағдарламаларды іске асыру, сондай-ақ бюджеттің тапшылығын қаржыландыру (профицитті пайдалану) жөніндегі іс-шаралар кешенін орындау бойынша іс-қимыл тәртібін айқындайды.