«Желі, штаттар, контингенттер туралы мәліметтерді жасау жөніндегі нұсқаулықты бекіту туралы» Қазақстан Республикасы Қаржы министрінің 2015 жылғы 20 ақпандағы № 108 бұйрығы (2024.09.12. берілген өзгерістер мен толықтырулармен)

Желі, штаттар, контингенттер туралы мәліметтерді жасау жөніндегі нұсқаулықты бекіту туралы
Қазақстан Республикасы Қаржы министрінің 2015 жылғы 20 ақпандағы № 108 бұйрығы

(2024.09.12. берілген өзгерістер мен толықтырулармен)

ҚР Қаржы министрінің 2017.09.08. № 486 бұйрығымен (бұр.ред.қара); ҚР Премьер-Министрінің Бірінші орынбасары - ҚР Қаржы министрінің 2020.16.04. № 389 бұйрығымен (бұр.ред.қара); ҚР Қаржы министрінің 2024.14.11. № 769 бұйрығымен (2024 ж. 9 желтоқсаннан бастап қолданысқа енгізілді) (бұр.ред.қара) кіріспе жаңа редакцияда

Қазақстан Республикасы Үкіметінің 2008 жылғы 24 сәуірдегі № 387 қаулысымен бекітілген Қазақстан Республикасы Қаржы министрлігі туралы ереженің 15-тармағы 146) тармақшасына және «Мемлекеттік статистика туралы» Қазақстан Республикасы Заңының 16-бабы 3-тармағының 2) тармақшасына сәйкес БҰЙЫРАМЫН:

1. Қоса беріліп отырған Желі, штаттар, контингенттер туралы мәліметтерді жасау жөніндегі нұсқаулық бекітілсін.

ҚР Қаржы министрінің 2024.14.11. № 769 бұйрығымен 2-тармақ өзгертілді (2024 ж. 9 желтоқсаннан бастап қолданысқа енгізілді) (бұр.ред.қара)

2. Қазақстан Республикасы Қаржы министрлігінің Бюджет заңнамасы департаменті заңнамада белгіленген тәртіппен:

1) осы бұйрықтың Қазақстан Республикасы Әділет министрлігінде мемлекеттік тіркелуін;

2) осы бұйрық Қазақстан Республикасының Әділет министрлігінде мемлекеттік тіркелгеннен кейін күнтізбелік он күн ішінде оны мерзімді баспа басылымдары мен «Әділет» ақпараттық-құқықтық жүйесінде ресми жариялауға жіберуді;

3) осы бұйрықтың Қазақстан Республикасы Қаржы министрлігінің интернет-ресурсында орналастырылуын қамтамасыз етсін.

3. «Желілер, штаттар, контингенттер туралы мәліметтерді түзу жөніндегі нұсқаулықты бекіту туралы» Қазақстан Республикасының Экономика және бюджеттік жоспарлау министрлігінің 2003 жылғы 31 наурыздағы № 58 бұйрығының күші жойылды деп танылсын (Нормативтік құқықтық актілердің мемлекеттік тізілімінде № 2254 болып тіркелген).

4. Осы бұйрық 2016 жылғы 1 қаңтардан бастап қолданысқа енгізіледі.