(БҰРЫНҒЫ РЕДАКЦИЯ) ҚР ПРЕЗИДЕНТІНІҢ 05.08.02 Ж. № 917 ЖАРЛЫҒЫ

Республикалық бюджеттiң атқарылуын бақылау жөніндегі есеп комитетi
туралы ереженi бекіту туралы Қазақстан Республикасының Президентінің
2002 ж. 5 тамыздағы № 917 Жарлығы

Осы редакция 2005 ж. 5 мамырдағы енгізілген өзгерістеріне дейін  қолданылды

"Қазақстан Республикасының Президентi туралы" 1995 жылғы 26 желтоқсандағы Конституциялық заңның 16-бабының 2) тармақшасына және "Республикалық және жергiлiктi бюджеттердiң атқарылуын бақылау туралы" 2002 жылғы 29 қаңтардағы Қазақстан Республикасы Заңының 8-бабының 2-тармағына сәйкес ҚАУЛЫ ЕТЕМIН:

1. Қоса берiлiп отырған Республикалық бюджеттiң атқарылуын бақылау жөніндегі есеп комитетi туралы ереже бекітілсiн.

2. Мыналардың күшi жойылды деп танылсын:

1) "Республикалық бюджеттiң атқарылуын бақылау жөніндегі Есеп комитетi туралы ереженi бекіту туралы" Қазақстан Республикасы Президентінің 1996 жылғы 19 сәуірдегі № 2956 Жарлығы (Қазақстан Республикасының ПYАЖ-ы, № 17, 137-құжат);

2) "Республикалық бюджеттiң атқарылуын бақылау жөніндегі Есеп комитетiнiң мәселелерi" Қазақстан Республикасы Президентінің 1996 жылғы 3 маусымдағы № 3012 өкімі;

3) Қазақстан Республикасы Президентінің 2002 жылғы 21 наурыздағы № 825 "Қазақстан Республикасы Президентінің кейбір актілеріне өзгерістер мен толықтырулар енгізу және Қазақстан Республикасы Президентінің 1996 жылғы 18 маусымдағы № 3038 Жарлығының күші жойылды деп тану туралы" Жарлығының 1-тармағының 1) тармақшасы.

3. Осы Жарлық қол қойылған күнінен бастап күшіне енеді.

Қазақстан Республикасының

Қазақстан Республикасы

Президентінің

2002 жылғы 5 тамыздағы

№ 917 Жарлығымен

бекітілген

Республикалық бюджеттің атқарылуын бақылау

жөніндегі есеп комитетi туралы

ЕРЕЖЕ

Осы Ереже Республикалық бюджеттiң атқарылуын бақылау жөніндегі есеп комитетiнiң (бұдан әрi - Есеп комитетi) мәртебесiн, өкiлеттiктерiн және жұмысының ұйымдастырылуын айқындайды.

1. Жалпы ережелер

1. Есеп комитетi республикалық бюджеттiң атқарылуына сыртқы бақылауды жүзеге асыратын және Қазақстан Республикасының Президентiне тiкелей бағынатын және есеп беретiн мемлекеттік орган болып табылады.

2. Есеп комитетi мемлекеттік мекеменiң ұйымдық-құқықтық нысанындағы заңды тұлға болып табылады, Қазақстан Республикасының Мемлекеттік елтаңбасы бейнеленген және өзiнiң атауы мемлекеттік тiлде жазылған мөрi, белгiленген үлгiдегi бланкiлерi болады.

3. Есеп комитетiнiң құқықтық жағдайы Қазақстан Республикасының Конституциясымен, Қазақстан Республикасының заң актілерімен, Қазақстан Республикасы Президентінің актілерімен айқындалады.

4. Есеп комитетiнiң құрамы Қазақстан Республикасы Конституциясының 44-бабының 7) тармақшасына және 57-бабының 1) тармақшасына сәйкес жасақталады.

5. Есеп комитетiнiң құрылымын Есеп комитетiнiң Төрағасы, мүшелерi және аппараты құрайды.

6. Есеп комитетiнiң қызметiн қаржыландыруға арналған қаражат республикалық бюджетте жеке жолмен көзделедi.

7. Есеп комитетiнiң негiзгi мiндеттерi:

1) республикалық бюджеттiң атқарылуы мәселелерiн реттейтiн бюджет заңнамасы мен өзге де нормативтiк құқықтық актiлер талаптарының сақталуын бақылау;

2) Қазақстан Республикасы Президентінің республикалық бюджеттiң атқарылуына байланысты мәселелер жөніндегі тапсырмаларын орындау;

3) бiрыңғай бюджеттік сыныптамаға сәйкес Үкiметтiң мемлекеттік және салалық бағдарламаларын және басқа да шығыстарын орындауға арналған республикалық бюджеттiң, кредиттердiң, мемлекеттік және мемлекет кепiлдiк берген қарыздардың мақсатты және тиiмдi пайдаланылуын бақылау;

4) республикалық бюджетке түсетiн түсiмдердiң толықтығы мен уақтылылығын бақылау болып табылады.

2. Есеп комитетiнiң өкілеттiктерi мен құқықтары

8. Есеп комитетi:

1) Қазақстан Республикасының Президентiне Есеп комитетiнiң жұмысы туралы тоқсан сайын ақпарат бередi;

2) Қазақстан Республикасы Президентінің республикалық бюджеттiң атқарылуын бақылауды талдауға, қорытындыларына және нәтижелерiне, оның кiрiстерiне салықтар мен басқа да мiндеттi төлемдердiң толық және уақтылы түсуiне, бюджет қаражатының мақсатты және тиiмдi пайдаланылуына байланысты мәселелер жөніндегі тапсырмаларын, сондай-ақ басқа да жекелеген тапсырмаларын орындайды;

3) Қазақстан Республикасының Парламентiне заң актілерінде белгiленген мерзiмде республикалық бюджеттiң атқарылуы туралы есеп бередi;

4) Қазақстан Республикасының Үкіметі уәкiлеттiк берген мемлекеттік органдар табыс еткен бақылау жүргiзу актілерін талдайды және осы органдар жүзеге асыратын республикалық бюджеттiң атқарылуын бақылаудың пәрмендiлiгiн арттыру жөнiнде Қазақстан Республикасының Yкіметіне ұсынымдар бередi;

5) бақылау объектiлерiнiң лауазымды тұлғаларының республикалық бюджет қаражатын пайдаланудағы iс-әрекеттерiнде қылмыс белгiлерi, Қазақстан Республикасының заңнамасын бұзудың өзге де фактілері анықталған жағдайда бақылау материалдарын құқық қорғау органдарына бередi;

6) республикалық бюджеттiң атқарылуын сыртқы бақылау стандарттарын әзiрлейдi және бекiтедi, жергiлiктi бюджеттердiң атқарылуын сыртқы бақылау мен республикалық және жергiлiктi бюджеттердiң атқарылуын iшкi бақылау стандарттарын бекiтедi.

9. Есеп комитетi:

1) республикалық бюджеттiң есебiнен қамтылған мемлекеттік мекемелердiң Қазақстан Республикасы бюджет заңнамасының талаптарын сақтауын;

республикалық бюджеттік бағдарламалардың (шағын бағдарламалардың) атқарылуын және кредиттердiң, сондай-ақ мемлекет кепiлдiк берген қарыздардың мақсатты пайдаланылуын;

мемлекеттік органдардың республикалық бюджетке түсiмдерiнiң толықтығын және уақтылылығын қамтамасыз ету бөлiгіндегі қызметiн;

республикалық бюджеттен мемлекеттің мiндеттемелерiн өтеуге арнап бөлiнген қаражатты бақылауды жүзеге асыруға;

2) республикалық бюджеттiң есебiнен қамтылған мемлекеттік мекемелердiң қаржылық есебiн бақылауды жүзеге асыруға;

3) республикалық бюджеттiң, оның iшiнде мемлекеттік тапсырыс бойынша алынған қаражаттарының пайдаланылу тиiмдiлiгiн бақылауды жүзеге асыруға;

4) Қазақстан Республикасы Үкіметінен және бақылау объектiлерiнен республикалық бюджет қаражатының түсу толықтығына және пайдаланылуына қатысты мәселелер жөніндегі қажеттi құжаттама мен ақпаратты сұратуға және алуға;

5) бекітілген республикалық бюджеттік бағдарламалардың (шағын бағдарламалардың) экономикалық тиiмдiлiгi мен мақсатқа сай екендiгiне баға беруге;

6) Қазақстан Республикасының Ұлттық Банкiнен бақылау объектiлерiнiң банк шоттары бойынша республикалық бюджет қаражатының түсуi, аударылуы және мақсатты пайдаланылуы бөлiгiнде банктер мен банк операцияларының жекелеген түрлерiн жүзеге асыратын ұйымдарды тексеру қорытындылары туралы мәлiметтердi сұратуға және алуға;

7) республикалық бюджеттiң атқарылуын реттейтiн нормативтiк құқықтық актiлердiң қолданылуы жөніндегі жобаларды әзiрлеуге және ұсыныстар енгізуге

8) республикалық бюджеттiң атқарылуын бақылауды жүргiзуге мемлекеттік органдардың тиiстi мамандарын жұмысқа тартуға;

9) өзi белгiлеген мерзiмдерде бақылау объектiлерiнен бақылау жүргiзуге байланысты мәселелер бойынша қажеттi құжаттарды, анықтамаларды, ауызша және жазбаша түсiнiктемелердi сұратуға және алуға;

10) республикалық бюджеттiң қаражатын пайдалану кезiнде бюджет заңнамасын бұзуға жол берген ұйымдар мен жеке тұлғалардың банктердегi шоттары бойынша операцияларды бақылау iс-шаралары жүргiзiлген кезде тоқтата тұру туралы ұсыныстарды қарау үшiн мемлекеттік органдарға жiберуге;

11) бақылау объектiлерi лауазымды тұлғаларының республикалық бюджеттiң атқарылуы мәселелерi жөніндегі есептерiн тыңдауға;

12) Қазақстан Республикасының Президентiне Есеп комитетi анықтаған, бақылау объектiлерi лауазымды тұлғаларының республикалық бюджеттiң атқарылуы туралы нормативтiк құқықтық актiлердiң талаптарын сақтамауы фактілері бойынша ұсынымдар енгізуге;

13) заңнамада белгiленген тәртiппен Есеп комитетi қызметiнiң мәселелерi жөнiнде тиiстi мамандардың қызметтерiн пайдалануға;

14) бақылау объектiлерi лауазымды тұлғаларының республикалық бюджет қаражатын пайдалану кезіндегі iс-әрекеттерiнде қылмыс белгiлерi, Қазақстан Республикасының заңдарын бұзудың өзге де фактілері анықталған жағдайда бақылау материалдары мен ұсынымдарды белгiленген тәртiппен құқық қорғау органдарына беруге;

15) Қазақстан Республикасының заңнамасына сәйкес өзге де өкiлеттiктердi жүзеге асыруға хақылы.

3. Есеп комитетiнiң жұмысын ұйымдастыру

10. Есеп комитетiн Қазақстан Республикасының Президентi бес жыл мерзiмге тағайындайтын Төраға басқарады.

11. Есеп комитетiнiң Төрағасы:

1) Есеп комитетiнiң қызметiне басшылық етедi, өзіне жүктелген мақсаттар мен мiндеттердiң орындалуы үшін Қазақстан Республикасы Президентінің алдында дербес жауапты болады;

2) Қазақстан Республикасы Президентi Әкiмшiлiгiнiң Басшысымен келісім бойынша Есеп комитетiнiң жылдық жұмыс жоспарын бекiтедi;

3) Есеп комитетiнiң лауазымды тұлғалары арасында мiндеттердi бөледi, Есеп комитетi мүшелерiнiң және Есеп комитетi аппаратының жұмысын ұйымдастырады;

4) өз құзыреті шегiнде бұйрықтар шығарады, нұсқаулар бередi, олардың орындалуын тексередi, Есеп комитетiнiң отырыстарында қабылданған қаулылар мен өзге де актiлерге қол қояды;

5) Есеп комитетiн қамту үшiн республикалық бюджетте көзделген қаржының шегiнде оның штат кестесi мен шығыстар сметасын бекiтедi;

6) Қазақстан Республикасының Президентi бекiткен Есеп комитетiнiң жалпы штат санының шегiнде Есеп комитетi аппаратының құрылымын бекiтедi;

7) Есеп комитетiнiң жылдық жұмыс жоспарының шеңберiнде жүзеге асырылатын бақылау iс-шараларының жоспарын бекiтедi, тексерулердiң кезеңдiлiгi мен ұзақтығын айқындайды;

8) Есеп комитетiнiң мүшелерiне тексерулер жүргiзу жөнінде тапсырмалар бередi;

9) Есеп комитетi қызметiнiң регламентiн бекiтедi;

10) Есеп комитетi аппаратының қызметкерлерiн қызметке тағайындайды және қызметтен босатады;

11) республикалық және шетелдiк ұйымдармен өзара қарым-қатынастарда Есеп комитетiнiң атынан өкiлдiк етедi;

12) Есеп комитетi Төрағасының жанынан консультативтiк-кеңесшi органдар құруға хақылы;

13) Қазақстан Республикасы Үкіметінiң, Қазақстан Республикасының Ұлттық Банкi басқармасының және Қазақстан Республикасының мемлекеттік органдары алқаларының отырыстарына қатысуға хақылы;

14) құпиялылық режимiн, коммерциялық және өзге де заңмен қорғалатын құпияны сақтауды ескере отырып, республикалық бюджеттiң атқарылуын бақылау мәселелерiне қатысты құжаттамамен кедергiсiз танысуға хақылы;

15) өзi белгiлеген мерзiмде бақылау объектiлерiнен бақылау iс-шараларын жүргiзуге байланысты мәселелер жөніндегі анықтамаларды, ауызша және жазбаша түсiнiктемелердi талап етуге және алуға хақылы;

16) бақылау нәтижелерiн бұрмалағаны, мемлекеттік органдарға беретiн және жария түрде берiлетiн ақпараттың дұрыстығы, заңмен белгiленген құпияны жария еткенi үшiн Қазақстан Республикасының заңнамасында белгiленген тәртiппен жауапты болады;

17) бақылау объектiлерiнiң лауазымды тұлғаларының республикалық бюджеттiң атқарылуы туралы заңнама талаптарын сақтамауының Есеп комитетi анықтаған фактілері жөнiнде Қазақстан Республикасының Президентiне ұсыным енгiзедi;

18) осы Ереженiң 15-тармағында көзделген негiздер болған жағдайда Қазақстан Республикасының Президентi тағайындаған Есеп комитетi мүшесінің өкiлеттiктерiн мерзiмiнен бұрын доғару туралы Қазақстан Республикасының Президентiне ұсыныс енгізуге не Қазақстан Республикасы Парламентiнiң Мәжілісi немесе Сенаты тағайындаған Есеп комитетi мүшесiнiң өкiлеттiктерiн мерзiмiнен бұрын доғару туралы мәселенi Қазақстан Республикасының Парламентi палаталарының қарауына енгізу туралы ұсыныстарға хақылы;

19) өзi орнында болмаған жағдайда Есеп комитетi Төрағасының мiндеттерiн Есеп комитетi мүшелерiнiң бiрiне жүктейдi;

20) Қазақстан Республикасының заңнамасына сәйкес өзге де өкiлеттiктердi жүзеге асырады.

12. Есеп комитетiнiң мүшелерi:

1) өз өкiлеттiктерiн жүзеге асыру кезiнде Қазақстан Республикасы заңнамасының талаптарын сақтайды, тексерiлетiн бақылау объектiлерiнiң жұмысына кедергі жасамауға және олардың ағымдағы шаруашылық қызметiне араласпауға тиiс;

2) Қазақстан Республикасы Үкіметінiң, Қазақстан Республикасының Ұлттық Банкi басқармасының және Қазақстан Республикасының мемлекеттік органдары алқаларының отырыстарына қатысуға хақылы;

3) құпиялылық режимiн, коммерциялық және өзге де заңмен қорғалатын құпияны сақтауды ескере отырып, республикалық бюджеттiң атқарылуын бақылау мәселелерiне қатысты құжаттамаға кедергiсiз қол жеткiзе алады;

4) өздерi белгiлеген мерзiмдерде бақылау объектiлерiнен бақылау жүргiзуге байланысты мәселелер жөніндегі қажеттi анықтамаларды, ауызша және жазбаша түсiнiктемелердi талап етуге және алуға хақылы;

5) өздерi басқаратын қызмет бағыттарының мәселелерi бойынша өз құзыретiнiң шегiнде дербес шешiмдер қабылдайды;

6) бақылауды тиiмдi ұйымдастыру үшiн қажеттi ресурстардың көлемдерiн айқындай отырып, тексеру бағдарламаларын бекiтедi;

7) тексерулер жүргiзу жөнiнде Есеп комитетi аппаратының қызметкерлерiне тапсырмалар бередi;

8) республикалық бюджеттiң атқарылуын бақылауды қамтамасыз ететiн бақылау-тексеру, сараптама-талдау, ақпараттық және өзге де қызмет түрлерiн ұйымдастырады;

9) бақылау нәтижелерiн бұрмалағаны, мемлекеттік органдарға беретiн және жария түрде берiлетiн ақпараттың дұрыстығы, заңда белгiленген құпияны жария еткенi үшiн Қазақстан Республикасының заңнамасында белгiленген тәртiппен жауапты болады;

10) Қазақстан Республикасының заңнамасына сәйкес өзге де өкiлеттiктердi жүзеге асырады.

13. Есеп комитетiнiң Төрағасы мен мүшелерiне Республика Президентi қол қоятын белгiленген үлгiдегi куәлiктер берiледi.

14. Республика Президентi тағайындаған Есеп комитетiнiң Төрағасы мен мүшелерiнiң өкiлеттiктерi Республика Президентінің шешiмiмен тоқтатылады. Республика Парламентiнiң тиiстi палаталары тағайындаған Есеп комитетi мүшелерiнiң өкiлеттiктерi Республика Парламентi Мәжілісiнiң немесе Сенатының шешiмдерiмен тоқтатылады.

15. Есеп комитетiнiң Төрағасы мен мүшесi:

1) орыннан түсуiнiң қабылдануына;

2) өздерiне қатысты соттың айыптау үкімінiң заңды күшiне енуiне;

3) белгiленген тәртiппен әрекетке шектеулi қабiлеттi немесе әрекетке қабiлетсiз деп танылуына;

4) антын, Қазақстан Республикасының заңдарын, Қазақстан Республикасы Президентінің актілерін және осы Ереженi бұзуына, өз мәртебесiмен сыйыспайтын жат қылық жасауына;

5) қайтыс болуына орай, сондай-ақ хабарсыз кеттi деп танылған немесе дүние салды деп хабарланған жағдайда мерзiмiнен бұрын қызметiнен босатылуы мүмкiн.

16. Есеп комитетiнiң Төрағасы мен мүшесiнiң лауазымы Парламент депутатының мандатымен, оқытушылық, ғылыми және өзге де шығармашылық қызметтi қоспағанда, басқа да сайланбалы және ақы төленетiн қызметтермен сыйыспайды.

17. Аппарат қызметкерлерiнiң құқықтары, мiндеттерi мен жауапкершiлiгi, сондай-ақ олардың мемлекеттік қызметтi өткеру шарттары мемлекеттік қызмет туралы, еңбек туралы заңнамамен, осы Ережемен және өзге де нормативтiк құқықтық актiлермен айқындалады.

18. Есеп комитетiнiң Төрағасы Есеп комитетi құзыретiнiң шегiнде бақылау iс-шараларын жүргiзуге қатысуға хақылы Есеп комитетi аппараты қызметкерлерiнiң шеңберiн айқындайды.

19. Есеп комитетi аппаратының қызметкерлерi бақылау нәтижелерiн бұрмалағаны, мемлекеттік органдарға беретiн және жария түрде берiлетiн ақпараттың дұрыстығы, заңда белгiленген құпияны жария еткенi, Есеп комитетi Төрағасының және мүшелерiнiң ез құзыретiнiң шегiнде берген тапсырмаларын уақтылы және толық орындамағаны үшiн Қазақстан Республикасының заңнамасында белгiленген тәртiппен жауапты болады.

20. Есеп комитетiнiң отырыстарында Есеп комитетiнiң жұмысын жоспарлау, ұйымдастыру, Есеп комитетiнiң Қазақстан Республикасының Президентiне, Қазақстан Республикасының Парламентiне, мемлекеттік органдардың басшыларына жолданатын есептерiн, ақпараты мен қорытындыларын даярлау мәселелерi қаралады.

21. Есеп комитетiнiң отырыстарын өткізу тәртібі Есеп комитетiнiң регламентiмен бекітіледi.

22. Есеп комитетiнiң қызметiн ұйымдастырудың iшкi мәселелерi, iс жүргiзу, бақылау iс-шараларын, сараптама-талдау жұмыстарын дайындау және жүргiзу тәртібі мен республикалық бюджеттiң атқарылуын бақылауды қамтамасыз ету жөніндегі басқа да мәселелер Есеп комитетiнiң регламентiмен айқындалады.

23. Есеп комитетiнiң қаулысы Есеп комитетiнiң отырысында ашық дауыс беру жолымен қабылданады. Есеп комитетiнiң қаулысы, егер Есеп комитетi алқа мүшелерi жалпы санының жартысынан астамы жақтап дауыс берсе, қабылданған болып саналады. Дауыстар тең болған жағдайда, Есеп комитетi Төрағасының дауысы шешушi болып табылады. Есеп комитетiнiң қаулысы оған Төраға қол қойғаннан кейiн күшiне енедi.

24. Есеп комитетiнiң Төрағасы мен мүшелерi өз өкiлеттiктерiн iске асыру үшін:

1) Қазақстан Республикасының Парламентiне республикалық бюджеттiң атқарылуы туралы берiлетiн жылдық есептi құрастырады. Есеп комитетiнiң жылдық есебi өзiнiң мазмұны мен сипаты бойынша Қазақстан Республикасы Үкіметінiң республикалық бюджеттiң атқарылуы туралы есебi жөніндегі қорытынды болып табылады;

2) бақылау нәтижелерi жөнiнде актiлер қабылдайды;

3) республикалық бюджеттiң атқарылуы жөніндегі жұмыстағы кемшiлiктердi жою туралы мемлекеттік органдарға, ұйымдарға және лауазымды тұлғаларға, Қазақстан Республикасының заң актілерінде көзделген жауаптылыққа тарту мәселелерi жөнiнде құқық қорғау органдарына ұсынымдар жолдайды.

25. Есеп комитетiнiң анықталған келеңсiздiктердi жою, мемлекетке келтiрiлген залалдың орнын толтыру және Қазақстан Республикасының заңнамасының бұзылуына кiнәлi лауазымды тұлғаларды жауапқа тарту жөнiнде мемлекеттік органдар мен ұйымдардың басшыларына жiберген қаулылары мен ұсынымдары оларда көрсетiлген мерзiм iшiнде қаралуға тиiс, егер мерзiмi көрсетiлмесе, онда олар алынған күннен бастап жиырма күннiң iшiнде қаралуға тиiс.

26. Тиiстi мемлекеттік орган мен ұйым қаулы және ұсыным бойынша қабылданған шешiмдер мен оны iске асыру жөніндегі шаралар туралы Есеп комитетiн дереу хабардар етедi.

4. Есеп комитетiнiң мемлекеттік органдармен және бақылау

объектiлерiмен өзара қарым-қатынасы

27. Бақылау объектiлерi Есеп комитетiне республикалық бюджеттiң атқарылуын бақылауды жүзеге асыруы кезiнде жәрдемдеседi.

28. Iшкi бақылау жүргiзуге Қазақстан Республикасының Үкіметі уәкiлеттiк берген мемлекеттік органдар Есеп комитетiне бақылау жүргiзу актілерін, сондай-ақ республикалық бюджеттiң атқарылуын бақылау iс-шараларын жүзеге асыру жоспарларын жолдап отырады, жергiлiктi бюджеттердiң атқарылуын сыртқы бақылау мен республикалық және жергiлiктi бюджеттердiң атқарылуын iшкi бақылаудың стандарттарын бекітуге ұсынады, Есеп комитетiмен бірге республикалық бюджеттiң атқарылуын бақылауды жүргiзуге шарт негiзiнде тәуелсiз жеке аудиторлық ұйымдарды тартуды келiседi.

29. Есеп комитетiнiң өз құзыретi шегiнде жүзеге асыратын қызметiне кедергi жасаған лауазымды тұлғалар заңнамада белгiленген тәртiппен жауапты болады.

5. Халықаралық байланыстар

30. Есеп комитетi шет мемлекеттердiң қаржы бақылау органдарымен және олардың халықаралық бiрлестiктерiмен байланыста болады, сондай-ақ Қазақстан Республикасының заңнамасында белгiленген тәртiппен олармен ынтымақтастық туралы шарттар мен келісімдер жасасуға және халықаралық ұйымдардың құрамына кiруге құқылы.

6. Есеп комитетiнiң жұмысындағы жариялылық

31. Есеп комитетi өзi қызметi туралы бұқаралық ақпарат құралдарына тұрақты түрде ақпарат берiп отырады.

32. Есеп комитетi оқтын-оқтын өзi қабылдаған нормативтiк құқықтық актiлердiң жинақтарын шығаруға не заңнамада белгiленген тәртiппен өзiнiң қызметiн қаржыландыру үшiн көзделген қаражаттың шегiнде осындай жинақтарды шығару туралы өзге де мемлекеттік органдарға немесе ұйымдарға тапсырмалар беруге құқылы.

33. Есеп комитетi ақпарат берудi мемлекеттік құпияларды, коммерциялық және өзге де заңмен қорғалатын құпияны қорғау туралы Қазақстан Республикасы заңнамасының талаптарына сәйкес жүзеге асырады.

7. Қорытынды ережелер

34. Есеп комитетi Төрағасының лауазымы материалдық-тұрмыстық және медициналық қамтамасыз ету, сондай-ақ көлiк қызметiн көрсету жағдайлары бойынша министрдiң лауазымына, ал Есеп комитетi мүшелерінің лауазымдары вице-министрдің лауазымына теңестіріледі.

35. Есеп комитетiнiң қызметiн материалдық-техникалық қамтамасыз етудi және көлiк қызметiн көрсетудi Қазақстан Республикасы Президентінің Іс Басқармасы жүзеге асырады.