|
“Конкурстық өтiнiмнiң демпингтік бағасын айқындау ережесін бекіту туралы”
Осы редакция ҚР Үкіметінiң 2005 жылғы 27 мамырдағы № 519 Қаулысымен енгізілген өзгерістеріне дейін қолданылды
"Мемлекеттік сатып алу туралы" Қазақстан Республикасының 2002 жылғы 16 мамырдағы Заңын iске асыру мақсатында Қазақстан Республикасының Үкіметі ҚАУЛЫ ЕТЕДI: 1. Қоса берiлiп отырған Конкурстық өтiнiмнiң демпингтік бағасын айқындау ережесi бекiтілсiн. 2. Осы қаулы алғаш рет ресми жарияланған күнiнен бастап қолданысқа енгiзiледi.
Қазақстан Республикасының
Үкіметінiң 2005 жылғы 20 мамырдағы № 481 қаулысымен бекітілген
Конкурстық өтiнiмнiң демпингтiк бағасын айқындау ережесi
1. Жалпы ереже
1. Осы Ереже "Мемлекеттік сатып алу туралы" Қазақстан Республикасының 2002 жылғы 16 мамырдағы Заңына (бұдан әрi - Заң) сәйкес әзiрлендi және ықтимал жеткiзушiнiң тауарларды, жұмыстар мен қызметтердi мемлекеттік сатып алу жөніндегі конкурсқа қатысу үшiн берiлетін конкурстық өтiнiмiнiң демпингтiк бағасын айқындау тәртібін белгiлейдi. 2. Осы Ережеде пайдаланылатын ұғымдар мен терминдер Заңға сәйкес қолданылады.
2. Конкурстық өтiнiмнiң демпингтiк бағасын айқындау тәртібі
3. Ықтимал жеткiзушiнiң конкурстық өтінiмiнiң демпингтiк бағасын айқындау кезiнде конкурстық комиссия, конкурс қорытындыларын шығарғанға дейiн, конкурсқа қатыспайтын өзара аффилиирленбеген кемiнде үш жеке және/немесе заңды тұлғалардан конкурс мәнiне ұқсас бiртектi тауарлардың, жұмыстардың және қызметтердiң бағасы туралы ақпаратты жазбаша нысанда сұратады. 4. Ықтимал жеткiзушiнiң тауарларға, жұмыстар мен қызметтерге (консультациялықтарды қоспағанда) арналған конкурстық өтінімiнiң бағасы, егер ол конкурсқа қатысу үшiн ұсынылған барлық конкурстық өтінімдердiң орташа арифметикалық бағасынан, сондай-ақ конкурсқа қатыспайтын және осы Ереженiң 3-тармағына сәйкес конкурс мәнiне ұқсас бiркелкi тауарлар, жұмыстар және қызметтер (консультациялықтарды қоспағанда) бойынша баға туралы өз ақпаратын берген өзара аффилиирленбеген кемiнде үш жеке және/немесе заңды тұлғалардың бағасынан отыздан астам пайызға төмен болған жағдайда демпингтiк болып танылады. 5. Ықтимал жеткiзушiнiң консультациялық қызметтерге конкурстық өтiнiмiнiң бағасы, егер ол қатысу үшiн ұсынылған барлық конкурстық өтiнiмдердiң орташа арифметикалық бағасынан, сондай-ақ конкурсқа қатыспайтын және осы Ереженiң 3-тармағына сәйкес конкурс мәнiне ұқсас консультациялық қызметтер бойынша баға туралы өз ақпаратын берген өзара аффилиирленген кемiнде үш жеке және/немесе заңды тұлғалардың бағасынан жетпiстен астам пайызға төмен болған жағдайда демпингтiк болып танылады. 6. Осы Ереженiң 3-тармағына сәйкес конкурс мәнiне ұқсас бiртектi тауарлардың, жұмыстар мен қызметтердiң бағасы туралы жазбаша нысандағы ақпарат ұсынылмаған, сондай-ақ баға туралы ақпарат сұрау салу жiберiлген күннен бастап бес күнтiзбелiк күн өткеннен кейiн берiлген жағдайда, демпингтiк баға конкурсқа қатысу үшiн ұсынылған конкурстық өтiнiмдердiң бағалық ұсыныстарын салыстыру арқылы айқындалады. 7. Конкурстық комиссия ықтимал жеткiзушiлердiң конкурсқа қатысу үшiн ұсынылатын конкурстық өтiнiмдердiң демпингтiк бағаларын ұсынуы фактiсiн анықтаған жағдайда, конкурстық өтiнiмдердi қабылдамау себептерiн көрсету мақсатында, конкурстық комиссия конкурстың қорытындылары туралы хаттамаға мынадай ақпаратты: 1) бағалық ұсыныстардың түпнұсқалары қоса берiле отырып, конкурсқа қатыспайтын, өзара аффилиирленбеген кемiнде үш жеке және/немесе заңды тұлғалардың конкурс мәнiне ұқсас бiртектi тауарлардың, жұмыстар мен қызметтердiң осы тауар рыногында сұраныс пен ұсыныстың өзара әрекеттесуi кезiнде қалыптасқан бағаларын сұрату нәтижелерiн; 2) орташа арифметикалық бағаны есептеу тәртібі; 3) орташа арифметикалық бағаны; 4) бағалары демпингтiк деп айқындалған конкурстық өтiнiмдердi енгiзедi. |