«Әскери міндеттілік және әскери қызмет туралы» 2005 жылғы 8 шілдедегі № 74-III Қазақстан Республикасының Заңы (2012.13.02. берілген өзгерістер мен толықтыруларымен) (күші жойылды)

Қазақстан Республикасының
Заңы
 
Әскери міндеттілік және әскери қызмет туралы

(2012.13.02. берілген өзгерістер мен толықтыруларымен)

ҚР 2012 жылғы 16 ақпандағы № 561-ІV Заңымен күші жойылды

Түпнұсқада мазмұны жоқ

Осы Заң Қазақстан Республикасы азаматтарының әскери мiндеттiлiгiне және әскери қызметiне қатысты қоғамдық қатынастарды реттейдi.

1-тарау. ЖАЛПЫ ЕРЕЖЕЛЕР

1-бап. Осы Заңда пайдаланылатын негiзгi ұғымдар

Осы Заңда мынадай негiзгі ұғымдар пайдаланылады:

1) әскери қызмет - Қарулы Күштердегі, басқа да әскерлер мен әскери құралымдардағы әскери қызметшiлердiң мемлекеттік қызметiнiң ерекше түрі;

2) әскери қызметшілер - Қарулы Күштерде, басқа да әскерлер мен әскери құралымдарда әскери қызметте тұратын Қазақстан Республикасының азаматтары;

3) әскери мiндеттілер - әскери есепте тұратын және әскери есепте тұрудың шектi жасына дейiн запаста болатын Қазақстан Республикасының азаматтары;

4) әскери атақ - әскери қызметшi мен әскери мiндеттіге берiлетін әскери айырым белгiсi;

5) әскери мiндеттілiк - Қазақстан Республикасы азаматтарының Қазақстан Республикасын қорғау жөніндегі конституциялық мiндеттілігі;

6) әскери киім нысаны - әскери қызметшiлердiң Қарулы Күштерге, басқа да әскерлер мен әскери құралымдарға тиiстiлiгiн айқындайтын, Қазақстан Республикасының заңнамасымен белгiленген погоны бар нысанды киім (киім-кешек) мен жабдықтар;