«Солтүстік Қазақстан облысы аумағында жануарларды ұстау Қағидаларын бекіту туралы» Солтүстік Қазақстан облыстық мәслихатының 2015 жылғы 14 шілдедегі № 36/7 шешімі (2024.08.01. берілген өзгерістермен)

Солтүстік Қазақстан облысы аумағында жануарларды ұстау Қағидаларын бекіту туралы
Солтүстік Қазақстан облыстық мәслихатының 2015 жылғы 14 шілдедегі № 36/7 шешімі

(2024.08.01. берілген өзгерістермен)

«Әкімшілік заң бұзушылық туралы» 2014 жылғы 5 шілдедегі Қазақстан Республикасы Кодексіне, «Қазақстан Республикасындағы жергілікті мемлекеттік басқару және өзін-өзі басқару туралы» 2001 жылғы 23 қаңтардағы Қазақстан Республикасы Заңының 6-бабына, «Ветеринария туралы» 2002 жылғы 10 шілдедегі Қазақстан Республикасы Заңына сәйкес Солтүстік Қазақстан облыстық мәслихат ШЕШТІ:

1. Қоса берілген Солтүстік Қазақстан облысы аумағында жануарларды ұстау Қағидалары бекітілсін.

2. Осы шешім оны алғашқы ресми жариялаған күннен кейін күнтізбелік он күн өткен соң қолданысқа енгізіледі.

Солтүстік Қазақстан облыстық

мәслихаттың 2015 жылғы 14 шілдедегі

№ 36/7 шешімімен бекітілді

Солтүстік Қазақстан облысы аумағында жануарларды ұстау

Қағидалары

1. Жалпы ережелер

1. Солтүстік Қазақстан облысы аумағында жануарларды ұстаудың осы Қағидасы (бұдан әрі - Қағида) «Әкімшілік құқық бұзушылық туралы» 2014 жылғы 5 шілдедегі Қазақстан Республикасы Кодексіне, «Қазақстан Республикасындағы жергілікті мемлекеттік басқару және өзін-өзі басқару туралы» 2001 жылғы 23 қаңтардағы Қазақстан Республикасы Заңына және «Ветеринария туралы» 2002 жылғы 10 шілдедегі Қазақстан Республикасы Заңына, «Жануарларға қарау қағидаларын бекіту туралы» 2014 жылғы 30 желтоқсандағы №16-02/701 Қазақстан Республикасы ауыл шаруашылығы Министрінің бұйрығына сәйкес әзірленді және Солтүстік Қазақстан облысының аумағында жануарларды ұстау тәртібін анықтайды.